信任

由明報到蘋果，在工作上好幸運地一直有好多人在幫我。而家我的御用排版阿勇同我好夾，又快靚正，如果無佢，我都唔知每晚幾時先沖到版，而且會錯好多。星期三佢放假，試過個版7條稿，全部都要刪字，那個排版員連縮相都懶得做，爆咗一行，縮一縮相都唔肯，結果剩係刪文，我都無時間睇大版一次，但阿勇最多只係要我cut一兩條稿的字就得，有時直程唔使，好多時佢會同我講「呢D等我搞惦」。我們是好拍檔，我feel到係一種信任，我信佢會幫我搞惦，我對佢無懷疑。同事都話佢唔會同人傾計，但就好詫異我同佢可以交談到，咁可能我同佢都係內向的人。沖完版後，我好多時都會坐係佢隔離一陣，一邊check多一次個版，一邊又同佢傾，我覺得可以坐係一個我信任的人隔離係好舒服。

明報幫過我的排版員雄仔同阿權，與阿勇都一樣咁勁，三個真係分唔出高下。我入明報後，絕大部份由17樓的雄仔幫我埋版，我又係好信佢，因為佢真係無得頂，那時再加上小葉，我地3個經常係17樓沖版時傾餐飽，尤其那時鄭生、johnson都去16樓跟頭版，我地真係無王管。我亦好幸運地得到小葉的幫忙，佢話特登睇我個大版先，咁鄭生就會快D將個版畀番我，佢又會特登淨係跟我個版，唔幫其他人，我地好夾。我去17樓埋版，佢又會跟我去17樓，去番16樓時，佢又跟埋來，佢幫我睇到好多錯。

小葉離職後，輪到阿森幫我，真係幫同教我好多，佢高級過我，但有時反而叫我做「主人」，到佢轉了去做教師，要出書叫我幫手校對時，就算幾忙都好，我無拒絕過，我唔會忙恩負義。我而家間唔中就會同佢食，兩次見工都有問過佢的意見。

仲有阿權啊，當入職後一段長時間，自己識埋版後，就將我彈返去16樓，慢慢就同阿權熟，第一次我同鄭生在16樓鬧交，我都問過阿權同阿森，佢地都話我語氣好差，第二日，鄭生於是叫我入房和解，如果唔係今次寫blog，我都已經唔記得呢段歷史。我對阿權百分百信任，我次次都搵佢幫我執版，我信佢會幫我在短時間內搞好同靚。

講信任，仲有游小姐，佢寫的稿，我真係唔需要懷疑，一定啱，又好難被你捉到錯字，佢係我心目中最好的記者。而我自己亦好鍾意被信任，ken姐當政時，有次頭版頭條大錯，bill哥哥之後問我有無睇過呢個大版，我話無，佢就話如果你睇過，就一定唔會有錯，bill哥哥有次又讚我，「你編個版，我放心」，呢種信任令我好感動。margaret挽留我時，又話如果我幫佢手，佢去了英國，都會放心。

在工作以外，我都在搵緊一些可信任的朋友，我好想將我開心同唔開心的事，毫無保留地同佢地講，而佢地又肯聽。在我最唔開心時，我試過在朋友面前或是在傾電話時喊，他們是我信任的，因為我願意將我最脆弱的一面完全給他們看到。