新的一年

人事總係複雜。今日有位主任離職，但在last day同老細以正式公開決裂結束賓主關係，我被夾在中間，左右做人難。有D同事都知我係少數可以同呢位主任傾到的人，但今晚收工時，首次收到主任的新年恭賀短訊，卻令我非常突然。是否太複雜了?

冬姐講有D同事係我放大假時同佢講，怕我日後被人騙同利用……我想我只係爛命一條吧!但多謝好多同事都好關心我。

今日我首次以助理主任的身份簽過我自己編的B1版及另一位同事的大紙，但蝦碌百出，我估日後production都會記住我，而且又代表新的一年，我將要好似今晚咁遲走，因為有時要睇埋車頭紙。噚晚我「準時」12點走，老細卻突擊12點15分打電話搵副採主，知道我「蛇王」，副採主幫我話阿ben病左，所以早走。坐我隔離位的一位同事已擔心我新一年的工作量會好勁。

老細很奇怪，主動提點我如果佢走，我都要搵定後路，因為已無勁人，但我好贊同時，佢又好似以為我會即刻走咁，勸我係蘋果做幾年。

病了幾個星期，先係傷風感冒，跟住嘔吐。係星期六，病到五顏六色，突然有種極不舒服的感覺，我失去了所有的方向，所有事都唔想做，但又瞓唔著，係張床度唔知想點，好彩幾個鐘頭後無左呢種不安的感覺。但其實，我係唔係真係失去左目標，唔知係唔係咁而家越來越遲起身，有時要返工都瞓到1、2點，連以前最鍾意的炒股都無玩到。新的一年已到，都係時候調整投資組合賺錢錢，睇來地產股係必買。越來越信靠主，但又無返教會，已兩個月無返啦，上次已被Bill ko問到口啞啞，係新的一年，係呢方面一定要做番好D。

原來對上一篇已係第200篇，記得係寫第100篇時，希望到200篇時心情轉佳。而家我希望已可以無後顧之憂。

上星期五放假有事去了中環，突然即興見仲有些時間去了香港仔搵阿權，同佢分享了好多放大假時的事。