大挑戰

老細生日，繼續放大假。我今日兼睇埋投資版同副刊，睇了幾次投資版，以今日我改得最多，我估佢地初時都以為我淨係簽完名就算，所以次次都出左大紙先畀我睇，但我今次改到其中一版要再出過張大紙，因為我改好多，但係我唔係為改而改，因為真係錯，「雙頂量度升幅目標」應為「雙底」；「每年股價可見2.2元」實為「今年」；「寺間」應為「時間」……尤其經過今日，我估佢地應該知道我唔係畫隻龜就算。我估佢地原本以為我係外行人，點知我以前係舊公司就係要睇埋投資版的大版，仲寫過下投資版。

不過，今日其實沖版時間比較遲，因為我真係睇唔切，但聽日先係大挑戰，因為聽日正常日新聞應該開6至8版，今日得5版都搞成咁，聽日都唔知點算。老細放假的日子，我特別辛苦。

個日老細仲好意思問我：「你而家係唔係無早起身炒股」，我答：「梗係無啦，晚晚咁遲走，第二日都12點幾先起身啦!」