三則事情

雖然心情都係差，但已好過之前，至少由地獄出返來，但就在門口徘徊。同事小白今個月同我食咗不少晚宵夜。同佢做咗friend、加埋知道Margaret原來咁關心我，是我今個月唯一的得著。除咗食宵夜，跟住呢個多星期又同冬姐與santa唱了兩晚K，搞到晚晚最早都要兩點半，最遲6點幾先返到屋企，搞到阿媽好驚添。

今個月完全無心機工作，返工時成日想東想西，好彩我經驗勁，只要沖版前畀我十幾分鐘聚精會神地睇一次，就已避免到錯漏百出。今個月我不在狀態，但最諷刺係幾日前上司Alfred同我講：「星期日我放假，你同楊淨(另一位同事)放唔放假，如果有你地兩個返，一個編頭版，一個編地產，我就最放心。」

這幾日在公司，有一些事情：
秘書派糧單畀我，但派錯，因為投資版主管的姓名只同我相差一個字，好彩我睇一睇個名，如果唔係就拆開咗。
我：妳派錯咗，如果燦哥拆開我份糧單，見到人工少咗咁多，實嚇襯佢。
秘書：哈哈，咁你又唔好咁自卑，你人工都唔低架。
我的人工係唔係真係唔低啊，但最驚訝係公司畀我千多元的year-end payment，我之前以為無添。

另外一單係，我有晚公司電話響，「呢度係唔係蘋果日報，我想搵Francis」，我部電話壞壞地，一直flash唔到，但我都想試下，就向人人都叫佢Francis的副採主，問佢的內線係幾多，但我最後都flash唔到，就同電話裏的人講：「我flash唔到，不如……」，我還未講完，佢可能以為我唔畀佢同Francis傾電話，於是佢就講：「我係Francis媽咪」，我嚇襯，就同副採主Francis講：「你媽咪搵你，不如你過來聽」，採主阿尹就講：「連阿媽都要打來搵仔」，副採主傾了幾秒電話後，就叫瑛姑聽電話，我都知出事。副採主笑住很尷尬地同我講：「呢排你工作壓力係唔係好大」，原來瑛姑都叫Francis，但所有同事都叫佢瑛姑，我點知佢都叫Francis鍋，結果搞到我好尷尬。

兩日前的一晚有位同事上了公司車，向我講：「點解你傻更更」，我估唔到佢會用傻更更呢幾個字。至於點解傻更更，那刻我又在想一些唔開心的事。