一周簡短回顧

過去一個星期在公司總是抽不到甚麼時間寫blog，股市大跌，在家又顧住揀合適的價沽股票，老細開會時又隨時問書，我又要做定功課。而家趁細佬未返屋企，用佢部電腦寫下一D事。

上星期六在街時，阿媽打電話畀我，話唔小心令CD機開了，但唔識off佢，之後我就返屋企off佢啦。本來呢件事好平常，但其實幸好之前拿起了那張敬拜的CD，因為阿媽好抗拒，佢係拜觀音等那類，阿爸同細佬就無所謂。阿爸係去年食飯仲突然同我講：「我估你始早都係信基督教」，而佢係唔知我間中有返教會。但我覺得唔只一個神卻係因為阿爸。讀書時，阿爸間中便會有一位八仙中的人物上身，那時的情景還歷歷在目，好難去形容，但我在小學時，又已信有主的存在。不過阿爸又無因為咁而去拜佛，佢又可以接納其他宗教。同一日Mike走過來同我傾，我都講了一些。日後如果同屋企人講，第一個應該會同細佬講，好似去旅行咁，屋企人中，暫時我都只是同細佬講。

財經版開始有人事調動，有人話下周一又會再有，最重要係等ricky返嚟，最佳損友將會調組，同事anita有晚收工前同我講，「你要開始習慣下」。講明係損友，好似周五佢都話我，「你唔係耍走我呀」。

星期五我要做定周日理財，我將漫畫拿畀副刊版採主過目同批准，點知佢同我講，「大個仔啦，自己決定啦」。好意外!

搬了去同細佬住後，睡的時間少過以前，因為同一層有單位裝修，但都ok，而其他亦不錯，至少可以用細佬部電腦頂住檔睇股票。細佬好辛苦，有幾日我返到屋企，細佬仲用緊手提電腦工作緊，但佢係返早上9點，佢已經係會計師，做多幾年，就會有好日子過，要頂住。

今日同屋企人去探外公、舅父佢地，外公係第一次見BB。跟住同朋友去行國際教育展、三聯、city super同崇光，好開心，多謝你。

今個星期其中一件事，當然係之前講過的股市大跌，我估賺少5、6萬以上，金額仲勁過以前玩輪時，我隔離的同事有日同Patsy傾電話，講我帳面蝕幾萬，其實兩者係不同的。美股又大跌近300點，星期一都係少睇港股為妙。