護老院

中午１２點幾我仲睡緊時，阿爸打電話畀我，要我立即趕去醫院幫手，因為就快有車將祖母搬去護老院，阿爸話佢一個人搬唔晒。我飛的去，總算趕得切。阿爸跟車，我就自己坐的士去護老院。有個親戚之前送左個類似水床的野，我就負責搬呢樣，超級重。

祖母自己有一間房，近八千蚊一個月，尿片就每月一千蚊，我地亦打算買架輪椅，每月仲有其他雜費。護老院只有兩位職員識得講福建話，令我擔心，因為祖母唔識廣東話，而且夜晚祖母要著約束衣。不過，D職員就好好人，另外今日我先知呢間的顧問醫生，原來就係我一位親戚，問番阿媽，原來都係因為佢介紹，先搬來呢一間，佢會一星期巡幾次，而且D姑娘都知我地係醫生的親戚，咁照計應該對祖母好D掛。

今日祖母精神唔錯，好多野講，姑娘要佢舉手同簽名，都做到晒，而且好多次祖母的反應，都令到姑娘好開心。