苦瓜乾

上星期六阿娟同我講，「唔好再同之前一樣，個樣成個苦瓜乾咁」
近兩個月，唔開心事總是接二連三，唔知幾時可以完呢? 這杯苦茶真的唔想再飲下去。

而家主要處理事項：
1)處理外婆的後事和陪阿媽
2)安定自己的情緒，這兩個月很波動
3)做好工作

永遠地睡覺

3點15分我離開醫院時，雖然她已開始失去知覺，但還可張開眼睛，但到4點幾打電話畀舅母時，就已經唔係度。

意想不到

很意外啊!Margaret在6點鐘竟然打長途電話關心我。

5點幾開會時alfred問我：你好似未醒?

睡吧

雖然昨晚向外婆開始滴嗎啡，令她失去知覺及永遠地睡覺，今早去探她時，她還可張開眼睛及認得我。

昨晚她很清醒，我們逐一見她，連一向堅強、近幾年持財欺壓我媽咪的大舅父也喊得很厲害，一切的恩怨是否可一筆勾銷。

婆婆，睡吧，睡了就不會再有痛苦。每次我們問妳痛不痛，妳總是點頭。

再見

今晚大家將會與外婆見面，因為她將要去另外一個世界生活，中午我在外婆床邊喊，被阿媽禁止，叫我不要在外婆面前喊。外婆一直都很清醒，但我們今晚卻要令她永遠地睡覺。

時間無多

今日早上同阿媽與細佬去探外婆，她還清醒，雖然因為插了很多喉，不能講話。外婆的情況已很差，阿媽講，因為外婆肺部都有事，醫生想在她的肺部再插喉，但阿哥提議不如讓外婆舒服些。阿媽日日去探外婆一、兩次，又睡不到，也很辛苦。我都要抽多些時間，陪阿媽去探外婆，因為時間可能已無多。

我有為外婆祈禱，上月開始因為自已很唔開心，多了很多祈禱同看聖經。

今日終於買了Bill哥哥推薦的書。

昨日同事avy話我有些行為似女仔。返了4個月新工，不少同事對我都很好。

又再喊過

幸好外婆的病昨晚都大步檻過，凌晨1點45分左右，屋企電話響，都知大鑊，舅母話醫院叫我們立即去，我同阿媽立刻趕去，總算醫生都救回她，醫生話外婆曾停了心跳，現在她心臟、肺、腎都有事，很危險，未必救到第二次，阿媽很擔心。我只是心情好番小小一個星期，估唔到又有另一單，我返到屋企終於又再喊過，近排很大壓力。呢排係唔係我太黑仔，將衰氣傳染埋畀親人，咁我寧願所有唔開心的事送番畀我，都唔好連累親人。
了一陣，今朝輪到我去睇醫生，很貴，770元，5日藥，而且有哥哥的referral letter，已經是打了折，那位醫生是我哥哥的老師。

一波又起

我外婆突然入了醫院，今朝的病情急轉直下，醫生話很嚴重，有生命危險，阿媽好唔開心，今次我要陪番佢，我都問阿爸使唔使返落來陪阿媽，我就上去同細佬住。

原來阿安向我講傳銷，很失望添，3個人圍我一個，被這些人纏住會很煩，可以點樣唔hurt阿安，但又可令佢地唔會煩住我，佢地仲叫我唔好同其他朋友講，想孤立我，你地估我真係未聽過傳銷麻。

企番起身

這個多月發生了很多事，已超出我可應付的能力，上周六終於出現轉機，很慶幸重遇《經濟》的Pansy，那日之後我未喊過，無再食安眠藥都可瞓到，如果有日她做了我上司，我一定會全力扶助她。

Pansy同我boss好friend，而她05年底曾interview過我，所以我識得佢。佢同我講Alfred經常讚我，話我的style很啱佢(雖然我唔贊成)，之後要將編務交託給我……當我同佢講我呢排質素大跌時，佢好意外，狂問點解，我只是話未適應。送我搭車時，佢問我點解未適應，我又只是話我好慢熱，佢同我講當我在明報到而家，一直是佢想請的第一選擇，之前in我時，佢都同我講過佢一直很欣賞我。總之，那一晚，她給了我很大的信心，幫我由偏離了的軌道，移回正確的方向，我唔可以再做得咁差，令欣賞我的人失望。

但我只是開始復元，可唔可以唔好擊沉我。

明日約了阿安，佢今日特登打電話提醒我，仲透露小小點解約我，話佢地有D東西想搞，想睇下我有無興趣。

工作

星期六聽了講道，心情反而由好番些變返極差，雖然那個5年的case，他想帶出的訊息很正面，但卻觸動了我。

唔知係唔係咁而影響了工作，連續3日做得唔好，但有唔少真係唔關我事。Alfred放大假，但星期一佢都返來鬧我們，副採主首當其衝，第二個就係我。Alfred話編那一版的編輯很明顯無心機。那版右手面有6則業績稿，出了大版D題好大，我問編輯主任不如縮細D，佢話唔駛；我揀的二條，那日主任話要放最底，結果又出事；最底D稿一向D題應該較細，主任話佢鍾意最底D稿做大D，結果又被人插。但我被人鬧時，無篤主任出來，我全程唔反駁，只怪自己那日編版時唔企硬自己的立場，下次真係無駛理佢，自己都夠經驗做決定。

第二日犯了自己一向唔會錯的失誤，就係記者提供的線圖數字同內文唔夾，我沖版後先發現，問記者點解唔同，佢都唔知，最後唯有整個美術圖唔要，要再沖過，那時已12點半。

第三日我又勁遲版，更嚴重的係我覺得採主揀錯頭條，我覺得應該做碧桂園首日孖展破新股紀錄，佢還勁過工行；但採主揀咗港股重越二萬關，問題係成交好少，實際只有三百多億。星期一Alfred先鬧完，佢話用熱門新股做頭條實無死，咁多散戶抽，做頭條唔會被人鬧。我已提過採主駛唔駛換頭條，佢話唔駛，最初採主更將碧桂園只做二條，我後來自己做主張，升做假頭。後來我問舊公司同事，都係用碧桂園做頭條。根據往績，做錯頭條，我都會一齊被Alfred鬧。

雖然我因為那個主任而被人鬧，但一單還一單，我們都算ok熟，佢成日撩我傾計。
同事Avy同我講：「我要向你學習，點解你可以同鄧生(主任)同阿勇(排版)咁多說話講，佢哋兩個一向唔同人傾計」，「你知唔知鄧生係自閉，佢淨係會同我講齊稿未、沖得未呢D，但同你就咁多說話講」，怪唔知同事笑我同鄧生係兩父子。

今日得到一位好朋友的提醒，佢提了我要「祝福」兩個字。後來睇到一句說話：除去指責人的指頭同惡毒的說話。