逆市奇葩

今日港股大跌六百幾點，我組合都散晒，好彩十隻股份中，有兩隻停牌唔使跌，有兩隻就逆市升，其中2312仲要急升15%，都算唔錯。

理財版採主昨日加大權力，地產副刊都納入佢管，地產阿頭被貶做副手，新官上任三把火，即刻將我的樓盤直擊大改，雖然都麻煩到我，但好彩已經主要都係佢自己搞惦。我一向都覺得佢叻，有新聞觸覺，勤力，而且有能力，難怪係老細第一愛將。之前老細被副社話無副手，看來至少有呢位採主幫手。

最近壓力唔少，因為我的問題越來越明顯，被好多人發現到，好難隱藏。

領匯股東會

呢幾日無寫blog，因為實在太忙，加上屋企附近又裝修，已超過一星期睡不夠。

星期一晨早去了領匯股東會，第一次去股東會，所以覺得幾新鮮，從拿投票紙、場內有人拉起橫額抗議、股東對罵，都覺得幾得意，舊同事賴美鈴還問問題，但我竟然完全唔認得佢，可能因為佢去明報不久，我就走了。見到被冷落的前主席鄭明訓，又見到TCI何志安。我是第一個股東離場，因為其他股東還要搶食，結果變得很矚目，記者問我問題，電視台又影著我，攝記又影我。離開時見到另一舊同事姜靜嫻，有同佢打招呼。

星期一晚，因為地產版出事，老細好遲才睇我的大版，佢行過來時，我話：「靠你啦」(因為要佢睇完我先有得沖)，佢立即彈開，話：「你唔好玩我啦，Ben哥，我靠你就真!」，幾搞笑。

後來聽同事講番，那晚老細好嬲，揚言要炒晒佢地，話要叫秘書準備大信封，等佢地逐個拿。最後梗係無啦，但第二日佢同地產版開會時都發晒牢騷，話佢地係佢的計時炸彈，隨時引爆。

噚晚，鄧先生見我連12：45班車都搭唔到，於是話載埋我，已是第二次坐佢架跑車，超快，之前已是幾個月前。佢又同我講佢的好，佢話屋企有700隻jazz的CD，勁多。之後知道「最佳損友」唔開心，於是去佢屋企樓下同佢傾。之前一晚凌晨3點，有一位舊同事打電話來，話好抑鬱，聽佢講了兩個鐘。兩個case極似，希望佢地兩個最後無事。

睇到畫

昨日終於好趕地單日編了兩版半，我還因為去拿博物館半年免費證而4點半才返到公司，還要開會，所以時間無多。隔離的同事都話其實昨日只有3版半新聞，但返了5位編輯，總算他們也要編些隔夜版，主任也可臨時改動工作量，結果有編輯11點已可離開。原本7點半開始要畫經一的版，我為了做隔夜版，延至9點才畫，畫完我還要去睇那些隔夜版的稿，到10點45分我先開始做經一，影響了質素，其實如果D隔夜可以周四已有，我就唔駛咁趕，好彩最後都順利搭到12點半的車，唔駛阻住同事去玩。

打牌玩到6點，跟住去排隊拿籌睇畫，好彩持有半年證而少些人，如果買即日票，總算我已7點半去到(9點開門)都100%會買唔到，總算策略成功。但因為我實在太累，看完《清明上河圖》同一幅宋徽宗的畫便撇低朋友而先離開，那時已是12點，我已超過24小時無睡過。

因為我持有未存倉的領匯股票，被採主安排周一早上去股東會，因為記者唔被入。

好忙

最近同下個星期工作會很忙，尤其今日遲些返到公司，要編兩版半，都唔知主任點安排工作，一版即日；半版星期日見報，但我明日唔返，即係要今日搞惦；一版星期一見報，但今日要畀美術排版。而今晚收工又約了同事打麻雀，唔可以遲走，死硬。

搬了去細佬度住，但阿爸之前無同我講，原來附近有單位裝修緊，我點睡啊，所以而家早上反而可以寫blog。

有位同事昨日同我暗示我升職的事，原來老細已同人講了，咁應該真係有機會掛。那位同事講，老細想栽培我，因為而家無人幫到佢手，老細又向她提及我在明報時已是睇版的事。

與舊同事睇唔成畫，我們未開門已去排隊都買唔到票，最後去了睇《哈利波特》。那日在銅鑼灣竟然遇到同事avy。呢晚同冬姐傾了很長的電話。又打了阿權的公司電話，恭喜佢升職!

沽了隻賺錢的太航(2343)，其實都覺得還有得升，但因為呢排全只是賬面賺，未真正有賺的落袋，所以沽了，呢隻被我估中係頭肩底，還有兩隻王牌未沽：新華(811)同神醫(8186)，呢3隻都好勁，其他還有好多隻中細價股還在搏殺緊，例如3898、1224、217、2312、397、2727、1129、8250等。

一切榮耀歸於主

昨日臨收工時，被老細叫入房，但我都知佢最近醞釀大改革。佢畀三條路我揀，第一全職轉做記者(我估呢個係佢首選，佢講了好多次)；第二主力做編輯，但要幫手寫專題；第三全職做回編輯。我的決定將會影響佢的部署，因為若我轉做記者，佢要請人做頭版，佢話無論我做編輯或做記者，佢覺得我都會做得好。我揀了第二，因為我剛剛先適應呢間公司，而且我情緒仍好唔穩定，唔想再有大變化住。跟住佢話打算升我職，到時副主任全力睇副刊，若睇新聞的主任放假，我便負責睇新聞版。我真的估唔到，如果係真的可以升職，將遠超我之前expect的時間，咁梗係好啦，但而家對好多事我已睇得好化，就算最後無都已好開心，因為至少佢覺得我ok。另外，最近在股市帳面上都好ok，覺得好好彩，令到阿爸無因為賺少了而唔開心，而我又無損失。

搬家

BB終於返新屋，星期六晚我幫手搬，以後就唔可以成日見到啦!

阿爸已退休，BB又搬走了，而家打算我搬去同細佬住，阿爸而家大把時間，就可搬來睇住祖母。但單位是6樓，我怕早上會較嘈吵，睡唔到。不過，搬屋可能代表我有新的開始。

雖然《清明上河圖》的預售票已沽清，朋友決定星期三都去博一博，睇下買唔買到即日票或半年證，我剛剛也申請放了假，怕那日只買到黃昏或晚上的票，返唔切工，其實主任都唔想我放假，因為有同事放緊大假，但我話有好多版時可call我返工，佢就放心啦。

老細話下個星期開始，我要幫手寫專題，但適逢那時我要編樓盤直擊，還要加額外的環球樓市，咁不是很辛苦嗎?

外公未出院

星期五收市前十分鐘，本來想買賣幾隻股票，但打極電話都唔通。不計靠人貼士的1224，呢兩三個星期自己的投資成績只是一般，除了太航及新華滿意，其他只是升跌各半，但我那兩隻滿意的，santa一隻555所賺的已同我一樣，佢0.7元買入，而家已1.1元，勁，不愧為新晉股神。

跟住就去醫院探外公，媽咪臨出門前講得唔清楚，去到先知是清除白內障，聽舅父講只是小手術。不過，原本可即日出院，但有阻礙，而家都未出得院添。

頭先一位大學同學來北角搵我食飯，因為佢剛轉去炮台山分行返工，但佢話月底會跳槽去星展銀行，我地讀金融學的，多數都做銀行，我是少數，因為我唔鍾意sell金融產品。佢話好多同學已飛黃騰達，有一位同學因為搵到好多大客，一早已年薪加佣金成幾百萬元，又買了碧堤半島，我幾年前聽聞佢已是一間銀行的副總裁，好勁，而且那些大客又彈好多股票貼士畀佢，所以賺好多。不過，我就完全無妒忌，因為我知那條路唔適合我，而家我份工都幾好。

我帶那位同學去大江戶食，因為我D現金券幾日後就到期，所以請佢食飯。那些現金券是上次同事與patsy和我食那間所獲得的。雖然以前去《經濟》見工時，patsy勁壓我價，但我知佢都係奉命行事，唔少人同我講，去《經濟》見工實被佢地壓價。以後大家有時見下面，吹下水都幾好。

最佳損友

星期五凌晨放工後，同「最佳損友」去傾計，是幾個月前銅鑼灣那次開始熟絡以來，我們傾得最長的一次。

朋友　我當你一秒朋友
朋友 我當你一世朋友
奇怪　過去再不堪回首
懷緬　時時其實還有
朋友　你試過將我營救
朋友　你試過把我批鬥
無法　再與你交心聯手
畢竟　難得　有過最佳損友
從前共你　促膝把酒　傾通宵都不夠
我有痛快過　你有沒有
很多東西今生只可給你　保守至到永久
別人如何明白透
實實在在　踏入過我宇宙
即使相處到　有個裂口
命運決定了　以後再沒法聚頭
但說過去　卻那樣厚
＊問我有沒有　確實也沒有
　一直躲避的藉口　非甚麼大仇
　為何舊知己　在最後　變不到老友
　不知你是我敵友　已沒法望透
　被推著走　跟著生活流
　來年陌生的　是昨日最親的某某
＊生死之交當天不知罕有
到你變節了　至覺未夠
多想一天　彼此都不追究　相邀再次喝酒
待　葡萄成熟透
但是命運入面　每個邂逅
一起走到了　某個路口
是敵與是友　各自也沒有自由
位置變了　各有隊友
REPEAT＊
早知解散後　各自有　際遇作導遊
奇就奇在　接受了　各自有路走
卻沒人像你　讓我　眼淚背著流
嚴重似情侶　講分手
有沒有　確實也沒有
一直躲避的藉口　非甚麼大仇
為何舊知己　在最後　變不到老友
不知你又有沒有　掛念這舊友
或者自己　早就想通透
來年陌生的　是昨日　最親的某某
總好於　那日我　沒有　沒有　遇過　某某

老細

昨晚本來想去bloomberg機印D資料做表，點知被老細捉住傾股票，成半粒鐘。但不論點，來了蘋果後，在他身上學到唔少，例如細價股、炒股竅門、新思維……若有日我真的離開，我一定會很答謝佢的教導。今日佢罕有地主持會議，又要我定頭條，又問了我好多問題，好彩我今次一早做了很多準備。

呢幾日成日好早起身後就好難再睡得著，於是睇聖經，看到箴言有幾句話唔好太過追求財富添。我估玩下股票唔怕掛，我仍然好鍾意鍋。雖然我以前讀過兩年教會學校，但我對聖經所寫的background都唔清楚，所以看後其實唔少都唔明。

《一個人的葬禮》

同事見到《壹周刊》一編報道《一個人的葬禮》，於是向我地募捐，而我最近在股市又有斬穫，於是捐了一筆不少的金額!那編報道真的很感人，所以之前在《蘋果》看過後，一直印象也很深刻。有位義工為獨居長者辦身後事，車馬費及不少葬禮的雜費也要用自己錢畀，而呢位義工更是另一位同事的爸爸，向我地募捐的同事也是透過內文的蛛絲馬而估到。

至於另一位很有愛心、去雲南做義工的friend，今日我就去寄生日卡給她，但可惜呢張卡會遲到添。

呢幾日睡不好，可能因為想太多東西，早上7、8點醒後便很難再入睡，幸好無得上網，所以早睡了。昨晚打電話給冬姐，原來她在廣州，而且已睡了，那時未夠3點，原來她也是早了休息。

昨晚臨收工，老細突然走過來，問我有無睇大家也買了的神州醫療通告，我當然無啦，他便用我部電腦想click畀我睇，但我其中一個網頁係我的blog，第一段已有講他，那時有小小驚，幸好他click了另一個。

打回原形

星期日，老細突然話睇好我。你放心，我當然不會令你失望。

我在地鐵銅鑼灣站上車，看到一位讀者睇我編的那版，睇到我在北角落車也未睇完。我想同佢講其實那版的新閒也沒有甚麼特別，版面也很廢。最近不少見報的版面，我覺得不好，其實不是來自我的構思，我覺得他們糟蹋了我的版。如果沒有好的idea，唔玩還好。在蘋果，其中一樣學到的，就是我的題起得越來越短。

昨日漏寫了一樣，舊公司新編輯kathy星期日見到我，第一句就同我講：「聞名不如見面」，究竟你地班同事之前係佢面前講了些甚麼呢，是唔好事?至於你們講的男編輯，真的幾靚仔鍋。

經過兩三個月，最終也是打回原形，唯有當無發生過，幸好當初我也沒有抱任何希望，而且最少也感受過三個星期的奇妙。

悠閒的下午

而家屋企又上唔到網，可能是一個安排，係唔係又要我唔玩股票，我只是玩了一陣，哈哈。

昨日同朋友去食tea，跟住去九龍公園，很悠閒的一個下午，無憂無慮，多謝你，下次我們係唔係一齊去看清明上河圖呢。希望短期內我可以少些憂慮同唔開心。

夜晚就與屋企人同阿嫂全家食飯，因為BB已滿月啦，已由6磅增至9磅半。我請客，幾勁，而家我真係好鍾意請屋企人食，是我經過呢幾個月才完全學識，是不是太遲。聽了「最佳損友」的提醒後，我託了媽咪買金鍊送給BB。媽咪話BB最適合由我照顧，因為BB也是夜晚很活躍、係度喊，而我也是夜睡一族，剛剛好。

今日終於見到舊公司兩位新編輯同事，上次去藍灣時，佢地無出現，緣慳一面。有人揀了《目黑》，令我想起冬姐，我同冬姐都好喜歡呢首，希望佢快些無事。因為Margaret有事要我幫她祈禱，所以呢排我在臨睡前開始為其他人：Margaret、冬姐、同埋一位在工作上做得唔開心的朋友祈禱。

投資

最近多了玩股票，因為要開始搵一筆旅行錢，但剛巧昨晚開始又上唔到網，真係玩我。隻1224呢幾日急升，點解會升，就係因為我，我沽貨後即升效應再現。幾日前又大震倉，單日由7.22元跌至6.79元，今次我選擇減持1/4，我係全日最低位減持唔夠十秒，即刻跳升3、4格。不過我都已經好滿意，至少其餘的3/4勁賺。

之前講過已買入的太航同新華文軒，而家都賺，尤其有日航運股炒上，但阿爸就唔開心，因為中海集運再急升近1元，我唯有當聽唔到，如果今次話未賣，我又要狽多成萬元，唔好掛，我已經唔知幾時先可賺番那筆錢，最多下次請多D佢食飯。

隻217同1129今日終於唔駛蝕，真係好，尤其隻217的MACD轉強勢，值得增持。跟老細買的確思同神醫，一賺一蝕，始終扭轉跟佢買多數蝕的惡運，南車今日終於開車，估中了出現大圓底。而家我就估本地銀行股值得撈底，又會係大圓底。但中國傳動，因為貪睡，那朝無追到貨添!

而家阿爸搬來同我一齊住，之前有日我同阿爸上網睇即時報價，由於可列出我的股票組合，阿爸跟住都問我：「你而家無買輪?升市唔買輪好蝕底鍋。」

竟然連續兩日與同事avy同車，由於昨日我遲返，今日想返公司上網睇股票而早半小時返，但竟然又同車，連avy都問我：「你係唔係有甚麼企圖」。但由於同佢傾談，所以呢兩日無在公司車睇聖經。雖然每日只是十多分鐘車程，希望之後可keep住睇。今日被avy發現了一件事，但佢無追問落去，佢可能唔知原來咁嚴重。

星期六係一位舊同事生日，生日快樂!

中伏

阿哥話唔使我幫手搬屋，剛巧今日主任突然叫我返工，話老細開多兩個全版，但就畀我遲返。我見都到食晚飯時間，於是食埋飯後才施施然返工，以為咁遲返唔駛做頭版，唔駛想漫畫，編經二多數又有廣告，勁正。點知被十面埋伏，唔只要做頭版咁簡單，要我編版半，有無搞錯，咁遲點編得切，仲要我的御用排版員放假。雖然最後都搞惦，呢D真係經驗同功力，哈哈，但我就趕了些，下次都係唔好應承佢。

轉變（續）

周六聽了講道，其中提及：如果有人在基督裏，他就是新造的人，舊事已經過去，你看，都變成新的了！

自從去年跟朋友開始返教會後（雖然我不是經常去，返小組更好像只是3次），出現了心理、行為、經歷的劇變。回想過去，是主有心安排嗎，是否要我脫胎換骨？在慘痛中，把我推倒，因為知我要在絕望中，才能讓祂進入我的生命，但有時又會伸出一下援手，就是要我去改變嗎。

我去年不情願地離開工作七年的公司，我很慢熱，所以初時我真的適應不了新公司，但真的不好嗎，覺得好像是有些安排，我只可以說幸好現在不是留在明報，而蘋果的工作開始帶給我信心，不像初時那樣；老細又好信賴我，總之開始漸上軌道，而且又有其他的得著。

去年１１月再也想不到藉口的情況下，向那位信賴的朋友講出真相，一件我一直唔肯同唔敢講的事，真的是安排嗎，是祂令我的口張開嗎，講了真的好好多，一直壓力很大，而且得到佢的體諒。

去年在明報被上司煩擾，不太開心時，我開始不斷想番那件困擾了很耐的事，跟住我那時又適應不了新公司，還有勁輸股票，又要我經歷一件痛苦的事，後來連一直未想過、要與親人離別也出現，令我越來越distressed，經歷了一生最艱苦的時刻。祂是否怪我仍然覺得不只一個神，還是要我在慘痛中脫胎換骨，巨變後認清了一些事，又令我不再點玩窩輪呢樣高風險的投資，是啟示嗎，呢幾個月只玩了中交及中壽輪，還要是朋友講才去買。

主的確又肯扶我一把，讓我在復活節遇到令我工作上重新振作的人，在我輸錢後又立即讓他再找我，賜回給我財富。又令我更珍惜家人。我又慶幸在我落難時，反而令我認識到朋友，例如「最佳損友」、會同我去旅行的你、越洋打電話畀我的margaret、eva也聽我傾訴，至於一直都好熟的那些朋友就唔駛講啦……我還要幾耐，我才能完全脫離苦楚，我仍然辛苦，但已好好多。賜予我機會去多些認識主。

上面講那些其實之前已講過好多次，無新意，哈哈。

大陣杖

阿哥７月３日要交樓畀人，但新屋未裝修好，而家七一回歸酒店價又貴，結果佢地全家連工人會搬去阿爸個單位，阿爸就搬返來同我住，咁我豈不是可以多D上去探BB，細佬就驚每晚都被BB吵醒。但為了迎接BB呢位貴客，要先將阿爸個單位大清潔，仲要騰出大量空間放置BB張床同好多日用品。幸好有同事與我調了假，星期一晚我就可以幫手搬。

而家換了和記，唔用CSL，發覺平真係無好，以前都會間中係返工途中，打電話畀santa傾股票，而家已經唔駛，搭地鐵時收得差，有些後悔轉了台。santa做了新晉股神，佢仲記得，以前係明報坐我隔離位時，我教識了佢好多。有人話係工作上好難識到朋友，因為大家都有利益關係，朋友主要係讀書時的那班，好好彩我同幾位舊同事都好熟。