大家加油

今個星期輪到我編５版樓盤直擊，加上有日係我短周，即係等於每日編兩版，很辛苦，搞到我唔可以在公司寫blog同覆email。

最近有兩位朋友工作得唔開心，都選擇了離職。希望在明天，苦過後就會是甜！呢一句我也送給自己。

樂仔，呢一年你付出的努力，學生是有目共睹的，你是一位好老師。

Agnes，無論妳作出怎麼的決定，我都會支持妳。在明報時，睇妳編的版都知妳有料，每次也花心思，例如講狀元時用了個大A字、迪士尼版、講民園麵家時就用筷字夾起麵，而麵內就放了內文、有次講法庭新聞就用法官用的鎚仔套表……還有很多好靚的星期日副刊版，仲有妳在明報最後編的那一版，用會考證書的graphic託底，妳之後還問我比報時有無人講妳那版。另一件最深刻的其實是妳寫的那位音樂家，他還有隻熊仔呢。就算其他人唔記得妳編的靚版，至少我記得。妳工作認真，不要因為小人的胡言亂語而失了自信，我不懂安慰人，但如果妳想搵人傾訴，我是隨時可以。

被副採主嚇襯

雖然副採主勁好人，但領導及做事一向都……。今日佢用港股做頭條，又因為右上角有廣告，佢就用東航做假頭。我６點幾分別問佢同記者，港股想點寫，竟然兩個都唔知，聽講星期六日都無市，唔係應該一早想好點寫麻，到７點幾再問又唔知，但漫畫要開工鍋。

我唯有去問alfred，跟住商量好用新股做頭條。然後，副採主同我講，佢好多稿要搞，「不如我畀D資料你，頭條你搞」，唔係掛，我要編經一、沖全版的地產副刊、做一個新股表，仲要我寫，梗係唔肯。不久，佢話假頭去唔到，我唯有又搞惦去。過多一陣，走過來話頭條唔知要點寫，我同佢講了要點寫後，掉轉頭幫佢搵資料。最後，引言我都要大執，佢連最重要周一同周二開始招股的３隻新股都無寫，結果我改了2/3以上。

如果同舊公司比，呢方面蘋果財經版係較差，舊公司至少Bill、阿戚同阿權都有足夠能力決定頭條，同點寫，但蘋果呢個管理層就……。

但一單還一單，我同佢都好傾，而且佢完全無架子，對我又好好。

被提「反收購」

是早我兩日生日的朋友，是一個大好人。再祝生日快樂!

當我做「媒人」向舊公司同事招手時，估唔到出現反收購建議，自己反被邀請回巢，又是阿尹言中嗎，佢話一入一出，佢成日估中我的事，我之前唔開心，佢又睇得出幾次，但我估這次他會錯吧!話說舊公司最近搞窩輪專欄，想我寫，因為之前在舊公司很多人也知我大玩窩輪，我立即轉換話題，即是無答應吧。這刻平復心情最緊要，不想再左思右想，是我在浪費機會嗎?我在躲避人?我不理智?我幼稚?我需要為自己的前途再仔細想下嗎，年紀已漸大，是我要為自己落下最重大的賭注嗎?我怕揀錯。我要找人商量下嗎?我又可以信任誰。再想下去只會令我頭痛。我還有價值吧，至少工作都得到認同，我很喜歡之前同Bill Ko食飯，佢同我講的那一句，「完全唔發覺你的工作受影響」。

以前在明報做過窩輪書仔及報紙的4頁專版，我都很滿意，那麼難的題目都搞到些變化，那時是ken fung做主任，我估她也會滿意我在呢次的工作表現吧!

今日去同老細、舊同事食飯前，在地鐵遇到Prudence，好開心，5個月無見，佢離職後，我同佢都食過幾次飯。我同佢以前都返星期六，有時就一齊食飯。好記得佢離職後，有一次搵我去行政部搞些小事，佢話咁多舊同事，第一個想起幫她手的就是我，梗係啦，我咁好人，找我幫手好少推人。佢今日提及一個人……

今日陪見工，他們雙方只是在認識對方，老細叫我只需負責幫佢地夾就可。唯獨有一件較重要的問題，他問我轉我去寫搞好唔好?

恭喜一位舊同事成功轉組，我都開心可以分享你的喜悅。你曾經問我，點解我走後，對你們的事還咁一清二楚，那要多謝你們對我真的很好很好，我離職後，你們仍同我傾談及商量咁多事，多些找我啦，我想關心你們，也想被你們關心。

Bill Ko快做爸爸，恭喜晒!

昨晚班同事勁讚明報的段潔靚，又將Cindy、joe lee擺上抬，其他編輯就因為唔識佢地而無反應，我以前是明報人，當然知道佢地係到講甚麼，雖然無聊，但勁搞笑。

喂同事，不愧我同你friend，竟然被你睇得出!

第100篇

原來已是第100個post，希望到第200個post時，我的心情會轉番靚。當初開呢個blog，係因為受兩個朋友的影響，其中一個係阿權，另一位是舊公司的記者，佢地都給了網誌畀我，阿權一向咁熟，而後者則由唔熟，變成佢離職後與我做了朋友。

為了留言，我還在xanga開了戶口。之後我試過在xanga寫自己的網誌，但因為小小的受阻，就轉在此處寫網址，一切都是巧合。

後來發覺原來好多舊公司同事都有寫blog，真是令我估唔到，有些很有深度，而我則是超級無深度的，看完後唔會學到甚麼事。

剛剛有位舊公司港聞同事MSN同我講，話得罪了張波，了解過後，其實是一件很小的事。Eva，妳知唔知佢係邊個呢？有次，在canteen見到佢只有兩隻手，但要拿兩樽熱維他奶，又要拿一堆飯盒，我見佢搞了好耐都唔惦，就同隔離的eva講：「不如我地幫下佢」，拿到上去後，其中一樽是嘉嘉的，嘉嘉同那位同事講：「你都好大膽，竟然要阿Ben幫你拿」，哈哈！我離職後，當佢工作有開心同唔開心時，都同我講，佢經常覺得煩住我，其實之前我唔開心時，我煩我的朋友得更厲害啦！

秘書突然送我一張西餅卡，原來當員工生日時，就會送給他，之前同事話已取消了，估唔到而家又有。

放工後與同事去了銅鑼灣惠康，買三文治食，我已在那裏買了幾次三文治了。

知道一位朋友做得唔開心，希望佢快些無事，我唔想佢唔開心。

被搵笨

今日很順利地搭到12：00班公司車，全架車只有我和另一位同事，佢亦是前明報經濟版編輯，識得鄭生，但我未來明報前，她已去了蘋果。佢向我報料，話編經一的一向唔使編其他版，我創了這個先例，要編埋「樓盤直擊」，太可惡了，主任擺明搵我笨，仲要舊年１２月我返新工第二個星期左右，就要我成個星期編兩版。

近期不斷聽到很多消息股，今次最新是我細佬推介保利（１１９），但我就未必買，一來已經升了很多，二來個走勢唔靚，三來我已持有好多股票，好高風險。

Kelvin

成功約番Kelvin食宵夜，是我離開明報後與他第一次見面，他試過約我兩次，但都被我推了，真的很對唔住！

記得幾年前Kelvin入醫院及休息了成個多月，那時我和另一位同事經常在返工前去探他，第一次還撲了空，因為是醫生巡房時間，唯有託護士將買的禮物及一張卡代交給Kelvin。

但食了不鍾意的牛肉。

有戲睇又有得食

昨日同一位好友去睇《蜘蛛俠３》，開心又好睇，有些情節幾刺激，我之前只是看過第一集，但劇情都跟得上。還收到禮物，真的估唔到，很多謝。之後就去食宵夜自助餐，但竟然發覺食了冷的食物後，在肚裏的感覺不太好，反而熱的就很舒服，但以前卻沒有這樣。

這位好友在F.7時坐我隔離，之後便熟落，很好傾。自己很喜歡歷史，幸好找到一位肯同我結伴去博物館，我始終最鍾意就是舊年去的海防博物館，因為我想了很多年，多年前kelvin話同屋企人去了，我都唔知幾羨慕，跟住第二鍾意就是去睇拿破崙專題展，兵馬俑展覽那個也很好，然後就是……我還想去李鄭屋古墓，但有次想約阿權去，佢就整盤冷水潑過來。以前同呢位朋友會不時去睇戲，但近兩年就好像未試過，對上唔知係唔係已經係《哈利波特》，今次大家又相約去睇番，感覺很好。

呢位朋友提醒我去睇bess的blog，因為之前無心情，所以無去睇，今日就在她的blog留言。各位朋友如有空，就留言支持下佢，她在雲南做義工教英文：http://hi.baidu.com/chiwing

講開blog，我都有３個blog，有兩個是為了在朋友的blog留言而開，遲D等我去開發下呢兩個blog。

食完宵夜自助餐後，就去join同事。大家約埋去Anita在將軍澳的屋企打機，主角當然是她那隻巨大的金毛尋回犬，我還冷不防地被牠親了我的臉。Anita屋企望出去的景觀很靚，但就唔開得窗，因為有很多飛蛾等昆蟲在出面。

又出錯

昨日見報我又出錯，但我都要到晚上才自己發現，引言「轉軚」，寫錯「轉態」，特此更正並致歉。

回顧3月份唔開心的4件事：
1)小小唔開心事：已解決，多得有人相助
2)唔開心事：差不多已解決，多得有人相助
3)很唔開心事：唔可能解決，但近期有小小好轉
4)很唔開心事：希望以時間淡化

搞笑的採主

放假完返到公司，採主阿尹即刻問我，噚日點解唔返工，我話因為同你食完宵夜，我被你嚇襯，所以唔返工。佢就笑住同我講，食完係唔係發惡夢呢？跟住我地兩個就係咁笑。編主與其他同事可能對我地兩人一齊去食宵夜覺得奇怪，所以都望過來聽。（註：那晚我與好友小白去食宵夜，採主也一齊來，是第一次同採主食，佢一向也好好人，又好搞笑，佢問我點解唔離開蘋果，跟住佢話「唔走係唔係因為我」）

前日小白送了件西餅同禮物畀我，又請我食宵夜，我們是老友記；另一位好友Amy這兩日，send了不少短訊慰問我，多謝！

也多謝其他的朋友，我心情又好番好多。感激冬姐！

輕鬆的一日

下午突然想起阿權，所以去找他，但離開時沒有坐同一架巴士，因為我去了灣仔。晚上就同另一位老友在旺角食西餐，陪我吹水了３個鐘頭。

剛剛同Bill Ko MSN，有些緊張，話晒係高層。

頭先同事打電話講我知，原來昨日見報我有條題錯了數字，雖然是記者計錯，但我責任也大，因為那日我也覺得金額太大，但時間太趕，沒有再計過，結果出事。也好彩同事夠醒目，遲一日才講我知，沒有昨日就打給我。

混亂

我的思想再次混亂，今晚我估要重新食一次安眠藥才ok，很想睡一個覺，這幾日睡不好，一來胡思亂想，二來咳得很厲害。ricky停薪留職，我都好想不拿薪水休息一、兩個月。

剛剛第一次收到鄭生的短訊，有些意外，但沒有甚麼感覺。

內向

星期六有兩個人不約而同問我，性格係唔係內向，因為見我唔多出聲，咁我一向都覺得係。佢地叫我唔好去刻意改變自己去做外向的人，其中一個話內向的人都有優點，例如會係一個好的listener。咁我都覺得我適合做listener，但３月我開始好唔開心時，就反而想人地做我的listener，有時可能只是想同朋友傾些無聊話題，轉移我視線，所以３、４月的D電話月費都double了，好誇張，以前我係唔會爆分鐘的，今個月都爆硬。

alfred今日拿住一版投資版，同我講入面有４隻股份佢都買了：308、康健、276同355。佢又問我用幾多錢買一隻股份。佢話每一隻佢都用超過十萬元，最多試過100萬買一隻，使唔使咁誇張，佢之前成日話佢那些都升了一倍，真係唔使做都得。

今日問alfred請唔請人，佢話請，叫我約我個friend出來傾，仲叫我都要係到，咁即刻佢有事想同我講，可能因為上次我miss了佢那餐「鴻圖大計」宵夜，所以想同我講番，但其實D同事已偷偷向我密報。原本我驚Margaret實斬死我，但那位舊同事同我講，Margaret成日都叫佢跳槽，又會咁，我都唔明。

做了個滿意的表

昨日見報華人置業做頭條，要我自己做一個背景表及找舊相，我去資料室及上網找到一些資料，因為之前記者同我講過佢資料不足，我便同佢分享，佢好開心，話有用，還請我食朱古力，雖然只是一粒，但代表我幫到佢，我都開心。

雖然為了個大表同配相做得好辛苦，10點45分先開始睇稿，但都有滿足感，alfred睇來都滿意我做的表，我還找到多年前的愛美高中國股價圖做配套!今日我睇番其他報紙，都係我做得最好，明報那個表還有錯添。

我雖然唔知會唔會返回明報，但我走時都想呢邊的上司很滿意我的工作表現。至於我返唔返，我有唔返的原因，而且Margaret都未必請我，因為我同佢講過我的工作表現已今非昔比，而且我又同佢講我的情緒很波動，會影響我的工作，咁講法邊有人肯請我。總之做好而家的工作最重要。

沖完版被alfred捉住傾股票，那日我勁遲沖，連３０分班車都搭唔到，佢仲唔畀我走，結果要搭１：０５班車。佢向anita推介台泥，anita話如果唔係一定賺，佢唔會買，alfred即刻問我「你有無辦法買股票一定賺」，我梗係話無。但我心想如果有人肯包底就一定賺啦，但如果我咁講，佢可能……

明日係一位朋友的生日，等我去買份小禮物送畀佢先。佢係我之前最唔開心時，成日被我煩住，總之無言感激，但我卻完全無care過佢，後來先知原來佢好忙，而且都有自己的煩惱。所以後來我婆婆有事時，我無再搵佢傾，因為怕又煩襯佢，點知我有位朋友知我同佢friend，所以同佢講了，佢就sms畀我，話我隨時可打電話畀佢。

最近可能落重藥，出現小小曙光。我就無大奢望，只有一個小小的請求。

冬姐同我講，johnson竟然問santa關於佢最近的情況，大家都很意外。會唔會與你又要跳船有關呢……

有記者msn問我，蘋果這邊最近有無請人，我會幫你問，但你係Margaret的人，佢由英國返來時實嬲死我。

回到從前

記得小孩時，每隔兩個星期左右，我們便吵著父母帶我們去外婆家，因為有得玩，我們次次都由上午出發，直至食完晚飯才返屋企。我們走時，外婆次次都落樓送我們搭車，是要行一段路的。有1年讀小學時的暑假，屋企大裝修，我們便住在外婆家近兩個星期，到而家都難忘。當這兩年我們與大舅父吵架，外婆有時又會來北角，與我和阿媽去酒樓飲午茶。可能是我第一次接觸到有親人離開我，這次對我來講都幾突然，我後悔從來未為她做過甚麼。

最近才知Lisa原來係精神科護士，令我想起阿哥叫了兩次，想轉介我去看精神科醫生。近1個月我毋須再食安眠藥已可入睡，但情緒仍很不穩，還只有一個星期，我估我辦不到。

今晚9點幾在公司發冷，弊在今日是我近幾個星期唯一一日無帶外套。但都好感恩，因為今日賣地，唔使我做經一，搵做開地產版的同事做，所以可以早走，離開時同事anthony借了一件外套給我，還陪我走，但今日捨棄了另一位同事。我來蘋果前，本來最怕人事關係，怕好複雜，但而家發覺都幾好，D同事都好好人。坐我左面的鄧先生，D同事都話我是全組唯一一個可以同佢溝通到；右面的楊淨，經常同我密談，互相爆料；後面的anthony都好關心我，今晚佢叫我飲熱的，送了一隻新杯給我，還遞了一包麥皮叫我沖來飲。當然少不了國金版的同事等。

做人要自私？

今日未睡醒，一位曾經好熟的中學同學打電話給我，借住話收到我借給他的３萬元，趁機問我借多兩萬元。之前他問我借３萬元，我後來應承了，那時他便坐地起價問我借５萬元，我拒絕後，今日又仍然向我下手。５萬元真的太多，而且你又話要好耐好耐才還到，那麼不明朗，點再借。

上個月有位舊經濟版同事勸我做人要自私點，要自我為中心，唔好太過顧及別人的感受，唔係會好辛苦。我可以做到嗎？自私不是缺點嗎？

今日alfred又唔滿意開會時其他人定下的頭條，問我「你都同意啊？」、「廢事D人話我又係一個人決定晒」。但其實我都覺得alfred對，應該做港股，只可惜我開會時掛住傾計，無發表意見，而家好似被佢認為我都不贊成港股做頭條添。

大重組

蘋果財經版將有人事及制度的大重組，最重要是我都受波及。

上周五原來alfred在放工後專登約３位同事食宵夜傾重組，我估如果我不是短周，應該也要去，今日其中一位同事即刻報料。

這次調動，alfred應該已想了很久，因為之前都聽佢講過部份，而且上周有兩位地產版同事同時辭職，惹起兵變疑雲，報料者講alfred之後面見其他地產版同事，問佢地會唔會再有人辭職。最神奇是alfred作為最高級的，反而要食宵夜的同事報料畀佢聽，話聽到J疊今個月將會收歸廣告部，咁我地的直擊將要加快大改革。另外，佢話地產版將會有人事變動，其中我的朋友小白亦將會加入地產版，現在管地產版的將會只管地產副刊，然後編採合一；跟住有兩個人會同時管地產新聞版。

國金版當然也有人事變動，但這個我已一早知，今日ricky最怕被削人，只剩３個人做晒。

至於我，也會受很大影響，alfred提出編頭版的負責定頭條，咁我會有好大壓力，幸好理財版採主提出投票。好彩我的電腦已好番，對我有很大幫助，中午上網時已可掌握一些重要的新聞。不過，我都覺得而家定頭條有很大問題，經常是港股做頭條，alfred亦是覺得唔想再係咁，佢話好多時都忍住唔出聲，其實佢係反對做港股，上周六見報就是例子，佢其實想做中石油。我估之後我可能間中要寫稿，例如周一的焦點。

電腦好番

電腦終於好番，可以在屋企上番網，可以睇番股票報價，很重要，又可以msn番一些朋友，相隔成個月，唔知佢地會唔會以為我死了。

昨日同Herbert見面，侍應態度很差，我１０點幾先到，只叫了一杯凍飲，有位侍應偷偷問招呼我的侍應我叫了甚麼食，當他聽到我只叫飲的，立即偷笑。Herbert向我仍然推薦買廣船（３１７）。他自己在８元左右買了，他的投資老師則在個幾元已入了。

樂仔! 唱k那日，他們話要揪出誰是二五仔，話點解你還知咁多明報事，你唔好供我的blog出來啊。

今日kelvin約幾時食午膳，我推了；幾日前又推了elsa。很抱歉，都是同一個原因。

今日講題係「友情」，感觸良多。

Ben啊，你也要開始為自己著想，前面條路雖然難行，也要想下辦法。

買不下去

今日去了細佬度用電腦，開了用開的即時報價，但我落不了決定買，因為心情再轉差。但我仍然很喜歡股票，所以才鍾意呢份工。

隻1224表現算唔錯，今日除淨後仍升1.3%。但隻中交輪就唔好提。

噚日在匯豐同中移領軍下，港股大升近300點，alfred突然問我，有甚麼好做頭條，理論上答做大市實無錯，我就唔鍾意咁簡單，我話地產股升好多，最後真係用地產股做頭條，而且今日地產股繼續狂升，呢D算唔算新聞觸覺，哈哈!

10點鐘約了Herbert傾談，跟住與舊同事唱K，已經是近兩個月來第4、5次同呢班好的舊同事唱K，友誼永固。

鄧先生

星期二出大版，頭條突然大改，成個方向轉。我要顧住改頭條，又要顧住其他稿有無錯，又要想個條新的大題，因為太趕，我一時想不到點起，由於alfred無返，我問主任級的鄧先生點起，但佢全程唔幫手，只是催我「A疊差唔多沖晒，要快D啦」、「搞點未」。結果沖了版後，我先想到條好題，我想改，採訪主任贊成，但鄧先生反對，因為佢怕鑊，我地已遲。雖然係同事中，我算同佢熟，但我唔鍾意佢無義氣，而家只求自保，之前我因為佢被alfred鬧，佢全程唔出聲，採訪主任搭車時向我透露，之前同一日佢副手被alfred在會上勁鬧，原來那些錯都是出於鄧先生的主意，但又係唔出聲。那日我堅持改，因為我想遲又係被人鬧，條大題咁差又係被人鬧，但應該激嬲佢，不過之後大家又無事，有講有笑。

估唔到我都有得加人工，初時無想過做了4個月都有得加。

我細佬個朋友開麵包店，他是用幾十萬元買了隻細價股340而勁賺，間舖需資80萬元，本來找我細佬入股25%，但細佬話唔會。我而家都寄望隻1224大升，那時我肯用成16萬元買，是因為一個信字，我信股神，加上我心情唔好，破釜沉舟，最多輸晒佢，估唔到咁快幫我收復3月初輸了的$38000，還有賺添，但而家想番的確是入得太多。最近細佬彈了兩隻股票309同1104畀我，但無心情買，不過真係升唔少，而家又有朋友彈了兩隻股票畀我，唔知買唔買好。

好同事!我知妳經常在逗我笑，唔想我唔開心，當我心不焉，無留心聽妳說話時，妳試過喝停我，唔想我胡思亂想，但3月時有一、兩次我反而想即場喊，妳唔畀我喊，我返到屋企都係喊，但4月已好好多。其實，我唔輕易在別人面前喊，除非那人是我很信任及那時我好唔開心。

葬禮定於6月1及2日才舉行，話檔期排得很密，所以才咁遲。