改流程

噚日轉了睇稿流程，採主睇完的稿先交編輯，再交晒畀我改完題先落版。由於唔少編輯質素唔係好得，變左畫版又係我，而家連起題都變左係我，以前好D，因為出完版後我同老細share一齊改題，唔駛我起咁多。最離譜係高級主任，佢噚日要編版，但頭條佢擺明亂咁起，條題長到死，又完全唔到point，跟住彈左畀我，要我起過，老細都偷睇左佢條題，同我講如果用佢條題，就唔使做頭條啦。我覺得壓力又大左好多。而且D時間，我多數用來度題，d稿就只有快速睇就算，勁馬虎。

本來過左去的星期日，老細要我in人，我係第一次做呢樣野，我本來仲搵埋TA姐陪我，點知老細唔記得叫秘書約時間，唯有等遲d。又會咁巧合，有個舊同事問我有無位，因為佢有個朋友搵緊工。

去探祖母時，有個親戚話佢識得附近一個病人，原來已在醫院６年，而佢個女咁多年來都每年365日朝九晚八去醫院侍候佢媽媽(親戚話佢應該識得醫院的人，所以唔受探病時間限制)，好令人感動。

以前住附近，我就好少返阿爸阿媽度探祖母，而家祖母入了醫院，我地反而見多左，真係諷刺。

四日假期

放了四日假，趁呢段時間，同了幾位朋友食飯。第一日就同一位好熟的中學同學逛完幾間書店後，去花園餐廳食晚飯。見佢終於轉工，仲開心過自己搵到新工，咁多年來佢為左興趣每個月人工都勁低，我唔係當事人，反而之前見到佢就成日叫佢轉工，而家佢就快做古蹟文物辦事處的二級助理館長啦，薪酬梗係大躍進啦。以前我地邊個去博物館都會搵對方一齊去，而家被佢搶先做左我想做的工添。同佢好多野傾，可惜時間實在太短。當我向佢講番主如何感動我時，我差D就喊左出來。

跟住同最佳損友食宵夜，我地為左一塊西多士爭持不下。我同朋友剛鋸完扖，又食了一個宵夜餐，點可以再食西多士呢?

第二日睡醒已下午，因為之前個晚玩通頂。原本我仲打算周圍去影教堂的相，結果告吹，惟有下一次。最後去了影印舖探阿權，搭車去時因為見走左架42號，就第一次搭41A，原來架巴士係由北角半山兜到去南區，雖然用多左搭車時間，但風景就好靚，仲居高臨下望大球場。

跟住同阿權一齊搭番車出來，我同佢都係天后落車，因為我去探祖母。好彩阿爸退左休，而家佢同阿媽輪流每日上下晝各去一次，因為要我地餵佢食，佢先肯食，反而而家無人有時間去探Luca添。護士建議住老人院，我就反對，而且我估祖母一定唔肯去。夜晚就同去旅行friend到杏花樓食野。

最後兩日假期去了廣州，因為有朋友的行家係暨南大學畢業，我地上去齊齊影畢業相。到左廣州，冬姐join埋我地，我地一齊去沙面逛，後來佢家姐仲駕車帶我地遊車河，同去毋米粥食宵夜，我覺得幾得意，好似食火鍋咁，但湯底就變左粥水，同埋D薄餐好好食。我地又去左「家有小熊」食野，餐廳放滿了「熊仔」，朋友就拿了兩隻公仔陪食野。

探祖母

要連續返工十日，但探病時間只有下午5點至8點，所以一直都探唔到祖母，幸好而家由東區醫院搬左去東華東院，可以係上畫探佢。今日阿爸先出發，我跟住自己去，行去東華東院的路上，傳來一陣陣的音樂，突然記起今日係大球場舉行類似全球祈禱日的活動，而那時正係到綵排。

終於見到祖母啦! 佢唔肯食野，於是只好幫佢掉鹽水，又唔肯食藥，話吞唔到，於是阿爸將粉末溝水，餵佢食。佢一直都係到話好痛，一見到我就叫我幫佢鎚骨，於是我全程隻手就重覆同一個動作。祖母淨係識講福建話，就算突然有野需要，都無護士聽得明，所以醫生每日都要打幾次電話畀阿媽問野。 阿爸估應該有排都出唔到院。

最後阿爸帶了我去看係東華東院，剛剛以祖母妹妹名字命名的教學中心。

今日返工好勞氣，以為執到寶，得4版，新聞版仲只有1版，實好得閒，結果做到死，如果今日老細有返就好。兩版樓盤版都有問題，其中一版真係睇到我眼都突埋，張大相中間竟然鋪塊好大的白地，放引言上去，原來張相中間有個好大的美聯logo，所以要用白地遮，咁當初就唔好用呢張相啦，同事話今日賣御龍山，代理都全部出動，實搵唔到佢地sent相來。有同事建議用地圖遮，我覺得都係醜樣，但就啟發左我用其他相去遮，我覺得出來的效果都可以。

敲響警號

今個星期六我要替高級主任返工，老細叫我要準時４點鐘返，原來社長一直有睇實我地，上個星期六高級主任６點先返，社長就向老細打報告，老細話社長其實知好多野，雖然我未同社長傾過一句，但老細話原來社長連我都識，只不過成日講唔出個名。好危險啊！

今日頭條做強積金收費，開會時我講左小小意見畀老細點寫，最後仲起左條副題；而且我幫編輯畫左一個自己幾滿意的版面；再加上去版時，我及時發現左一個大家都見唔到的大錯，老細話好彩睇到，如果唔係功虧一貴，Molisa亦話我不愧為驗屍官。覺得自己今日都貢獻唔少，好開心。我唔會好似有人咁，以前當我編頭版時，就完全袖手旁觀。

朝早一起身，阿爸突然同我講祖母入左醫院，嚇左我一跳，原來96歲但之前一直無事、咁耐以來淨係入過一次醫院的祖母，有日突然經常跌倒，仲話背隻好痛。初時唔肯入醫院，仲話如果要死，要死係屋企，結果阿爸要叫埋阿哥，捉左佢入醫院留醫，但祖母係醫院好唔聽話，阿爸話最後應護士要求，逼於無奈簽字綁住祖母。佢一定好辛苦啦，而且實嬲死我地。

呢件事，再加上祖母妹妹星期四出殯件事，突然覺得會唔會已經敲響警號。

龍舟傳聖火

同朋友agnes去了看龍舟傳聖火，好多人，好好睇。係火炭站已見到國旗飄揚，又有唔少人著住紅色衫，或者貼上中國加油的貼紙。出到城門河場面仲壯觀，兩岸都企滿人迎接聖火。雖然已被人佔據晒有利位置，好彩識得企上石壆睇，先見到聖火同龍舟隊橫渡城門河的一幕，心情好興奮。食完野後係新城市廣場睇直播，見到陳弈迅同張學友傳聖火。

跟住我去左灣仔買禮物，仲買了兩張生日卡，雖然款式唔多，但估唔到其中一張寫左一句聖經的經文，就係我最鍾意的哥林多後書那一句，好意外，完全無想過有。我打算將那一句同一位快生日的好朋友分享。

今個星期有兩日要早起去葬禮，一個係組員的媽媽，另一個係祖母的妹妹。

由於做替工，我要連續返工十日，將補假押後係五月中，可以放四日大假，先苦後甜。