「回歸」?

噚晚同賢仔食宵夜，事緣係幾日前聽到阿君已離開舊公司，於是打電話恭喜佢可能升任第二把交椅，跟住就約了食飯，anita細妹都有來，我都有同佢講得罪forrest的事，佢都話forrest好記仇。

阿君辭了職，我覺得好可惜，佢真係美術組的猛人，我同佢以前合作做過好多得意之作，尤其係創富Money，例如保險、內地樓，以及ken姐係比報時大讚的稅貸等系列，又有強仔罕有地提名的李錦記篇。佢同麥家輝為我帶來了好多難忘的回憶，大家的合作到而家仍歷歷在目，我真係好多謝佢地!

今日又趕唔到公司車，今日仲要成半個鐘一班，但完全無唔開心，因為「同學仔」Tony都趕唔到，於是一齊去飲野，隔了那麼多年，估唔到可以係蘋果重逢。

上星期四、五見港股牛皮、細價股又開車，即刻撲埋去亂咁掃，但估唔到港股突破三萬，咁D熱錢可能又買番大價股，而家唔計新股，都持有成十幾隻，好危險!

近排有些同事話我心情好了，副採主都問過我點解咁開心，我想我已收拾了不少心情，唔再係以前經常被人話係苦瓜乾的臉口，採主都無再問我係唔係輸了股票，希望我的心情由去年下旬到而家開始形成一個圓底，而我的工作能力亦開始回升緊。

施總透過朋友向我詢問回巢意向。但呢邊的老細正用人之際，我亦唔可以離開佢鍋。

漫談

今個星期突然有位同事打電話畀我，向我呻，其實都知佢呢排心情好差，大發雷霆，但估唔到係咁，其實都可以大事化小。

本來想介紹一位舊同事去《經濟》做，因為佢經常同我抱怨好辛苦，工作量勁多，又話後悔之前有人介紹時，但最後都沒有去in。但今次當我搭好門路，佢又話唔去in，真係搞佢唔惦。

噚日最難忘的係同daphne的傾談。從明報到蘋果，大家都識了幾年，還是第一次傾得咁深入。緊緊miss了一班公司車，於是行商場，跟住大家遇到就一齊坐公司車。大家分享了很多，包括唔開心的事、信仰等，佢仲話係下月離職前送本書畀我。

放工後去了最佳損友屋企打機。佢隻福福好搞鬼，叫佢時，佢識搖尾，又成日行去「糧食倉」，然後用雙眼望住人，要人畀食物或零食佢食。但如果佢係度食，你叫極佢，佢都唔會理你或搖尾，你睇幾現實！

一筆勾銷

今日行去北角地鐵站返工時，竟然見到前面走過來的是前上司，已無需要迴避，可能唔係同一間公司，以前的恩怨已完全一筆勾銷，甚麼都唔記得咁，於是主動同佢打招呼，跟住佢先見到我。如果係以前，我已避開了佢，真的很感謝主。今日的遇見令我知道呢個包袱已放下。

終於請了同事食，本來想搵老細的秘書搞，點知佢唔在行，但同事聽到，佢地都好興奮，採主話：「今晚阿sir請食飯」，極搞笑，結果有位同事幫我叫元氣的外賣，而我只是負責畀錢。佢好幫我慳錢，只是用了千元，結果同事當然唔夠食，正如同事講兩個人去食都要300元啦，何況而家成個經濟版的人食。不過，同事都知真是心意，採主都同我講啲同事會明白。好多同事同我講好食，話好過幾日前叫的元祿好多。同事avy剛食完飯，佢都加入，同我講：「如果唔係畀面你，真係唔食!」有位記者帶了飯，都畀面食了小小。今次我請得好開心好開心!

不過，本來應承了最佳損友會請食肯德基，但因為同事反對下而擱置，而佢唔食壽司，唯有下次請番佢食雞。

焉知非福

今日老細同我講了我加薪有幾多，當然滿意啦，除了去年跳槽那次，今次是做了咁多年加得最多的一次。想番轉頭，若不是當初肯降職，可能沒有機會有空間升職，更不會有而家的加薪，而家的人工較離開明報時，多了超過四成!!!

可能有好多事也是這樣，失去了可能將來會得著更多。

當初還很驚轉工，而家反而不錯。更重要的是識了好多新朋友、工作同玩股票的眼界擴闊了好多等等。

其餘三位升職的同事已請了食飯，等我明日也請下先。

Colleagues

我的「飯友」(一齊食飯的同事)，但有一位無返工。

噚晚去了最佳損友屋企玩，仲同佢隻狗仔福福影了相，4點幾走時去了麥當勞食早餐。

老細又打電話來

頭先電話響起，從外電顯示知道是老細，已心知不妙，果然重提兩三日前要我做的事，問我點解未有行動，我向他再次解釋我的難處，好感激老細好像明白咁，當佢提出間接的方案時，佢自己都講：「咁可能都會知道係你做的!」我雖然無優點，但忘恩負義是絕對唔會做，是我的底線，我想唔會因為呢件事而得罪老細掛，正如我對老細都唔會忘恩負義啦，但我都知老細點都會因為我拒絕而有些唔高興。

罕有地同老細傾了近25分鐘電話。咁啱佢講起AH股互換的報道，我亦向他講出星期四那日的重大難題，我本來都想起證監否認那個point，但別有內情。佢亦同我share了人事的問題，同升職名單背後的故事。老細係一位率直的人。

連續兩日farewell Ricky，星期四是大圍，估唔到老細會畀晒所有錢，噚日則是小圍。

噚日同冬姐食飯，佢跟住帶我去行三間LV店，估唔到海港城店門外竟然大排長龍，打晒蛇餅等入去，但我跟住冬姐，梗係唔使排隊啦，當有遊客見到冬姐的LV袋，就很羨慕，更質問職員點解那個袋唔可以預訂，聽冬姐講佢個袋平靚正，最重要係數量不多，可能因為咁唔接受預訂，職員都寧願將預訂的quota畀熟客啦!

美股大跌，但我還要在星期四入了8129添，兇多吉少。

全歸於祢

是的，要學懂感恩!

終於恢復原職，沒有特別開心，反而意義更重要，證明在兩間公司我都有能力升任呢個位!

雖然愛股今日勁跌，但810急升37%(上圖)，300亦升19%，兩隻也只是買了兩日左右。

今日超級高興的是冬姐應承在我放大假時，做臨時工。當我向老細提出這建議後不久，秘書就同我講我的大假批准了。我知人手會越來越唔夠，呢個建議係唯一可以令老細放心畀我放假的辦法。

另一樣開心的是今日同阿偉食午飯，對上一次見面已是半年前，大家係咁吹水。

「鞠躬盡瘁」

今次終於輪到我出錯，表同內文都係寫蜆殼，但其實全球市值一哥應係埃克森美孚，只怪我一時大意。我走後，老細發現去改，但都有一些係錯版，至少我屋企那份係。

將有多位同事離職，老細係會上叫同事唔好放大假，我之後原本想叫秘書遲一日先交畀老細簽放大假紙，費時佢一講完，我就話要放假(雖然之前佢口頭批准了，但因為較那時又多了一位同事離職)，但已大遲。老細走過來。
老細：你個死野，放咁耐假!我頭先先簽字，遞上去升你職。
我講笑地講：你畀我放啦!最多之後我更加鞠躬盡瘁。
最後老細無我咁好氣，走了。隔離的同事聽到「升職」，即刻向我查問，我於是照講。

原來事情越來越嚴重。到了晚上，老細問我係唔係唔可以放少些，佢先同我講出新的難題所在。我搭公司車時，老細竟然罕有地打電話畀我，想我做一件難事，但我無應承佢，因為我寧願唔放假，都唔可以應承佢，因為我會被人「斬死」，我唯有想其他方法。

其中一位離職的同事，在明報時已同我合作過，估唔到佢而家又走。

小時候的Forrest

同事畀了我幾張Forrest以前的相，而家當然超大隻啦!

睇拍劇

噚日下晝與幾位中學同學去Rita的新屋，在油塘站時，係車廂巧合地遇到都會去的一位朋友。

德福實用率真係好高，Rita的新屋雖然只有600多呎，但個廳大得好梗要，佢話有些業主間多一間細房，變做3房，但加牆要8萬元。呢間屋唔駛200萬元，好抵，但附近有行車天橋，有D噪，所以唔啱我，因為我朝早要瞓覺，我的dream house最重要係寧靜。

我最深刻的，是與Rita的一段對話。
R：而家仲有無返教會?
我：已連續四個星期有返晚堂(不過昨日無)，但無去小組。
R：咁而家點?( 去年中我遇到難題，有搵Rita傾，所以佢知呢件事)
我：今年信多了好多
R：信了後，咁好多事都會變得唔介意
我：係啊，好多事已變得唔介意
是的，我要去學習放下很多事情。

看了卓韻芝在星期六蘋果見報的一篇文章「我好像找到了快樂的方法」，提醒了我一件事情，是要去感恩。

夜晚同最佳損友去漢陽苑食韓燒，飽得好緊要。之後係皇室堡出面仲見到黎姿同關禮傑係到拍戲。

激嬲Forrest

估唔到同事隻狗Forrest仍然唔睬我。事緣幾日前搭同事架車，同佢超大隻的金毛尋回犬一齊坐後排，我一上車，Forrest即刻極熱情地撲向我，由於我冷待佢，佢之後好快就唔睬我，全程將頭擰轉面，我點叫，佢都唔理我，Forrest好明顯地down晒，伏係椅上，連主人叫佢，佢都無反應，幾個月前上佢屋企時，仲記得Forrest好活躍，佢而家好慘，我道晒歉都無用。今日收工時，那位同事問：「想唔想氹番Forrest?」但當我再次上佢架車，Forrest走近我一陣後，便即刻重複之前唔理我的態度，咁點算啊!

有位同事好主動地將本運程書畀我睇，採主就問：「你唔係信教麻?」可能同事Daphne同採主講掛。再記得上次食tea時，Daphne問我一個人，我敷衍過去。

老細呢排成日話我多說話講，又話係因為我心情好，跟住就話因為我賺大錢；佢又問我去旅行，唔擔心啲股價跌嗎，佢話細價股后就算去旅行，都成日打電話番來問股價。我跟住同佢講，股票就算大跌，都唔會點影響我心情，所以我可以放心去旅行。

老細今日講了一位坐附近同事的一件事，我想講你估錯啦，但你卻暗中講了一個秘密畀我聽。

組員

可能因為我上次「靜悄悄」地走，搞到佢地最後要打番電話搵我，於是今次jean即刻問我食唔食飯、ken又截住我，提醒我一齊食飯。

Nick因為put期指而勁輸，我同佢講番我以前得到的教訓，我很多年前曾因為買put輪而慘敗，所以知道在大牛市唔好亂put，而且升市莫估頂。

希望Lisa快D無事，無想過有人會做呢種惡作劇。亦估唔到我臨去搭車前，佢突然同我講唔好意思累了我要遲走，但我點會不滿，因為我都試過好唔開心的日子。

細價股 Vs 細股價

估唔到有一位無宗教信聊的舊同事，想我幫佢祈禱，我嚇了一跳，而我昨晚已做了。

昨晚等最佳損友放工後，先去食晚飯，後來去7-11買啤酒飲，結果塊臉又勁紅。佢同我分享了好多往事，但我卻點出佢可能十多年前係中了計，但我都係估下，很多事就是那麼奇妙，如果當年揭發了只是別人的奸計，命運可能就這樣改寫。好多事好像被安排了一樣，我也同佢講了過去一件往事的最新睇法。我們就是這樣可以無所不談。

呢兩日見報又有錯，昨日就金手指有錯，今日就有一編稿寫「細價股」，但內文同文字表全部都寫了「細股價」，真係唔知成編稿有無人審閱同睇過。

milestone

星期四要1點半返公司開會，仲要追車尾，1點34分先入去，好尷尬，因為肥佬黎、社長、老總等高層已係裏面。

今日隻1224勁升17%。星期一股價仲係只11元，與同事食飯時，佢地話如果隻股票去到14元，我就要請幾位聽者去洲際食自助餐，我應承了，所以今日有同事即刻打電話畀我，要我book定枱，因為今日已超過14元，好多同事都知佢係我隻愛股。

之前無聊時，我計計自己的財富，原來一早已進入一個里程碑。

大鑊飯

昨日紅假，半個鐘頭先有一班公司車，我本身已好遲，仲要送車尾，結果第一次搭的士返工，個司機竟然係鬼佬，但講廣東話，勁好人。

我遲了返工都知衰，之後老細真係講了一句：「頭先搵你，見你唔係度」。老細跟住同我去食tea，講了好多畀我聽，例如邊D人會升及降職，同佢的部署……其中一樣係佢話計劃11月升我職。但我反而已對升職無感覺，我其實想輕鬆下，做少D。

而家美術Tony見到我，稱呼我做「同學仔」，好得意。

我放大假突受阻，向老細請假時，佢話採主都係同時放，「唔可以兩個key person都同時放假。」

估唔到的電話

星期五同美術阿頭又鬧了一場，但佢真係太懶，連漫畫每個人任何動作都要我諗，食甚麼又要我想，我忍唔住加一句：「咁顏色使唔使我指定埋」。

星期六見報又見到有錯，投資版宏安(1222)股價係2.07角，而非2.07仙。真係令人氣餒。明日見報我做那版又差些錯，內文同表記者都寫一手賣163伙，但少計了皇府山，其實係165伙。

連續三個星期都有返晚堂，但因為一些事，無同佢地食，所以好少人知道我有返，噚晚就人話已好耐無見到我，本來噚晚想同紹德講話唔食先走，但轉眼佢同其它組員已唔見了人。隔了幾十分鐘，估唔到娟同紹德打電話畀我，問我係邊，真係非常意外，我下次唔會咁無交帶。紹德還游說我返小組，因為我一向都無去。

跟住同最佳損友與Rocky食宵夜，但因為之前探完BB後，已同屋企人食得好飽，所以食量一般。在打邊爐期間，有位同事打電話畀我，大家八卦了一輪，佢向我透露一些10月會升降職同事的名單，雖然有些我都聽過，但有些卻很意外。