遲來的一封

雖然噚日已經係年廿二，但竟然還收到中國版蔣姑的利是。以前已經係明報識得佢，有次我打電話畀圖晝館的bonnie，佢仲扮鬼扮馬，接聽電話時話係bonnie秘書。新年時係蘋果好多次遇到佢，次次佢都無帶利是係身，成日叫我去中國版問佢拿，但我梗係無啦，都咁大個人。噚日係canteen遇到，佢仲記得未畀我，我話唔使，但佢話一定要畀，跟住我又無當係一回事，之後係2樓再見到佢，佢就係外套度拿出來，估唔到佢為左畀我於是就放係衫度等畀我，佢真係好有心，我好感動，遲來的一封反而係最難忘，好多謝佢。

我仲記得去年底我係公司發好大脾氣，之後那日佢仲叫我少D勞氣，佢咁遠都聽到，我先知道那次咁大件事。我好感謝主，之後我突然識得點樣去處理同michael成日的衝突，唔使動氣，而且可能好快我唔需要再發漫晝。

一年又過去……

無間道

我每次深夜返屋企，係樓下都見到幾隻貓係垃圾堆搵野食，於是前晚就拿迪迪食剩的貓糧畀佢地食，點知佢地唔理我，等我下次再試下。

「大師兄」返左來!我的御用排版阿勇今個月淨係需要返4日工，好羨慕，而家終於回歸，我好掛住佢。老細噚日同我講：佢返左來，你就開心啦!沖完版後，我同佢講番呢個月發生左的事。

間碟同內奸有時真係防不勝防。最近又發現係公司有兩單無間道的事，但搵唔到邊個係二五仔。

完成考驗

噚日下晝有事去左油麻地，我仲未食飯，於是搵冬姐食tea，點知佢同我相反，過左海去金鐘掃貨。好彩我醒目，買左個蛋榚仔食，因為後來要行大運。係太古廣場的Gucci同佢會合後，就跟埋佢去驗貨，冬姐果然係高手，睇完見LV二手貨後就私底下同我講出件貨有好多問題，連變左色都見到，我就一d都睇唔到，後來無買到，然後去銅鑼灣Gucci，再去青衣，最後去佢大角嘴的屋企，因為佢隻貓已餓左十幾廿個鐘，冬姐一開門，就見到阿丁係門口係咁叫，佢隻貓超大，大隻過迪迪幾倍，而且幾得意。跟住冬姐買左3個燒餅去佢老公的寫字樓一齊食，然後近10點先去佢的「飯堂」食野，本來食tea變左食宵夜。跟住與最佳損友同去旅行friend係銅鑼灣食野。

蘋果舊同事間小食店正式開張，我又有去湊熱鬧，仲有送花牌，有好多同行都有來，好意外見到以前明報總編檯的andy，立法會議員長毛都有來，原來舊同事同長毛好熟。最遺憾仍然係見唔到游小姐。

呢兩日老細故意畀重大考驗畀我，就係佢唔返，我一個人睇晒所有版，投資版主管本來想返來幫手，老細都叫佢唔使。我覺得一個人真係睇唔切，但OVERALL我覺得表現都OK，雖然都有小問題。係明報我都睇版，但感覺同蘋果唔同，係明報至少有BILL、JOHNSON幫手睇版，呢度真係只有我一個人睇晒同改題，而且蘋果版數較多，睇得辛苦D，加上讀者多，令到我有壓力唔可以有錯。不過，反而越難越有挑戰性。

錯開有條路

又錯題!「調高」變「調低」。有一晚我又睇車頭紙，一睇條題就知道多數錯，庫房多錢，點會有人建議減免稅額咁犯眾憎，那晚老細掛住做新地單野，無睇版，結果就錯，後來高級編輯主任自首，條題係佢起。今次聽講話有6萬紙係錯，上次賭神單野就十萬紙。

點知前晚ta姐又見到錯題，又係高級主任起，咁點搞!

對錯

原本覺得好搞笑，但第二日返去先知到後果咁嚴重，有兩個女要養的編輯被炒、老細被高層逐一鬧、有主任會收警告信。噚日與ta姐食tea時同佢講，呢幾日不斷在想我應唔應該講出個錯，如果我無講出來，又無人發現錯，佢就唔駛被炒。雖然老細不時都想炒左佢，但我好像變了導火線，覺得好似累左人。

同最佳損友及佢的家人夾份買了部遊戲機，佢地又買左康樂棋、魚蝦蟹，到時去佢屋企玩時，有多D新野玩。

今個星期六高級主任要放假，我要第一次係蘋果返星期六簽版。

賭神再現

由於唔係我收版，我只係有時留低睇車頭紙，噚晚老細叫我睇下，我就留低啦，估唔到好戲連場。首先我睇到華華版caption錯人名，夏佳理寫錯左夏佳里，後來我又睇到華華版另一個caption錯左右。港聞個邊同老細講：「你一定要警告個編輯」。

但好戲在後頭，我上左公司車，睇睇下發覺B2有條題，竟然將股神寫左賭神，我嚇左一跳，打電話畀ta姐想問清楚，因為佢管國金版，但打唔通，我唯有睇一次內文，睇下佢地係唔係想玩賭神個point，但全篇文都無寫，於是打電話畀老細。老細見到係我打來，我估都知死，呢個時間佢應該驚左我，我講左後，佢都嚇親。隔左兩分鐘，佢聲線好似死左咁問我：「仲有無錯」。

南柯一夢

最近睇左以撒、雅各、約瑟、摩西等的故仔，想起兩樣野，原來第一次返小組時組員話有人被兄弟賣左去埃及，原來係講緊約瑟；第二就係之前睇過的一D畫，原來係講緊佢地，而家終於明白D畫的意思。又知道邊個係撒母耳同約拿單。

上星期係公司pantry睇到有個盆，入面放左條金魚，覺得好得意，於是問最佳捐友借相機，因為佢係記者，有時會帶住，結果個日無。跟住帶佢去睇金魚，睇睇下時投資版主管經過，佢話應該係公司池入面的金魚，但可能病左，所以浸緊藥。

年三十同年初一都返工，好彩都有得早走。星期六同屋企人去完拜年後，就去左同事屋企打邊爐同玩wii及打牌。跟住同最佳損友及奇奇去旺角食街邊野，接住下一站就係去最佳損友屋企玩。

近幾年已經無主動向同事拜年利是，始終都已咁大過，但都有唔少同事主動走過來畀我。一眾同事向Wisery利是時，我反而上去食tea，但估唔到後來佢都有畀我。舊同事Elsa仲怕我怪佢唔畀我，噚晚11點幾打電話向我解畫，話成日係公司見唔到我，所以仲未畀。唔熟的丹琍、Kitty、steven都有畀。採主亦有畀……

最近都有同Margaret同Eva講，係蘋果D人真係好好，問題只係制度。整體來講，我係呢度好開心。

見到舊公司用「南柯一夢」來講述去年港股，好有感覺。其實好多野都係南柯一夢，但總算都有過一場好夢，已經好好。

雖然已經delete左，但見到那幾個number仍然係熟悉，想了一兩秒，最後都係接左。

舊相(可愛篇)

舊相(大戰篇)

壓力

噚晚雖然唔使等車頭紙，但老細坐左我的位，所以我走唔到，結果1點45分老細車我地去食宵夜，其實聽老細講野，學到好多，但如果係股票，我最近就怕左佢，成日買同一隻股票，佢賺我蝕。今日想入市撈底，但又唔想自己揀，因為最近成日失利輸唔少，於是打電話畀ta姐問佢買左邊隻，我於是距佢買廈門港同洛鉬。

返番教會，感覺與感恩，同旅行時一樣咁強烈，那日聽到一首好好聽的聖詩《真愛》。不過，唔鍾意係食飯時遇到的詢問，咁又難怪，因為除左Amy外，其他組員都唔知道我的野。Ken想我返小組，但我興趣唔大，之前去過，佢地講的我都唔明，佢地已經係高班。

對上那次返小組，佢地講約伯、亞伯拉罕等，我一頭霧水，甚麼信心之父，我只是聽過亞伯拉罕呢個名，但就唔知佢的事跡，但我之後真係有畀心機去查番佢地的故仔，仲睇埋《約伯記》。去旅行時，有些畫我唔明，朋友同我解釋番那幅係講亞伯拉罕，另一幅係大衛擊敗巨人哥利亞，一些就係講聖母……我地兩個係度互補不足。我之後都有查番邊個係大衛。

採主最近問我有無將d相放上網，但我D相仲係相機度，都未搞過，哈哈，慢十拍。

今日係公司車睇番《哥林多後書》我最鍾意的一節，其中一句係「我的恩典已經夠你用」。

迪迪近照

我睇來睇去，都覺得貓B迪而家好似好謝。而家每逢係街度見到貓，都會第一時間想起迪迪，唔知佢而家點呢?

上星期四老細車我出觀塘，但係將軍澳一段單程路有街燈塌下，結果同另外兩位同事困係老細架車到，要等到街燈移開先有得走。跟住就去觀塘食宵夜，結果好夜先返到屋企。

最近撈底，點知越跌越低，唯有止蝕，睇來都係持盈保泰較好，唔想連舊年賺的都蝕埋。今日原來隻1224去過18元，大升110%，我賣左先來急升!!??原來應該係錯價盤，因為只有一手成交。

老細提過下，新請的同事快會返工，到時人齊，我就可以騰出個經一畀其他人編。

去唔去?