意外收穫

噚日本來係我長周，但之前一晚收工時，老細突然叫我放假，因為我的補假已超過十日的limit，而且星期六見報一向版少，老細可以應付。９月我要繼續清假，咁都好，等老細知道而家的情況有幾惡劣。

１２點幾朋友叫醒我，跟住我極速出左門，我地去左銅鑼灣太平館餐廳食，因為佢表妹話好食鍋。我地叫左豬脾飯同瑞士雞翼意粉share。

讀書時已聽過高街鬼屋呢個名，其實就係教會附近，食完中午後就去左影相，因為以前返崇拜都係夜晚所以影唔到，加上我想係呢一日去教會祈禱。雖然而家間鬼屋只保留左外貌，至少吸引到我。

行到近６點，本來想打道回府，但因為已經係繁忙時間，好難截小巴，於是就繼續行，點知遇到葉劉、史泰祖等人係到拉票，我於是膽粗粗搵葉劉影張相，可能可以同名人影相所以好開心，周圍打電話同朋友講，係今日之行的bonus。雖然我同佢的政見不盡相同，但至少無對佢有反感，而且我覺得佢做野應該幾惦，女強人本色。

雖然因為太熱覺得有點累，但都去埋甘堂第同中環警署。

後來其他同事打電話來約我食宵夜，但因為我同最佳損友一早約左去打邊爐，所以推左佢地。

係值得感恩的一日。

芝芝

上星期六去銅鑼灣食晚餐。跟住就去最佳損友屋企玩，因為佢最近收留左隻西施狗芝芝，而且可以探下福福，我覺得佢地兩隻相處都幾融洽，芝芝個樣幾可愛，好得人鍾意。不過佢比較自閉，因為對上的主人成日鎖佢入籠，令到佢而家大部份時間想係籠入面，唔肯出來，可能係籠入面佢先feel到有安全感。咁當然有野食就另計啦，餵佢食正餐時佢就即刻出來；我地食緊月餅時，福福就固然走過來，好似人咁企係到，用前腳按係人的膝頭，連自閉的芝芝都肯出籠，伸晒舌頭，跟住小霸王福福搵野食，咁當然最後兩隻都無份食啦。

你地知唔知點解影相時，佢地兩隻點解咁乖肯望鏡頭呢？咁當然有食物係佢地前面啦！

５點幾搭小巴返屋企，後來舊同事Edwin竟然上車，那時我已經就快落車，雖然只有１分鐘左右的時間，彷彿我地已經傾左好多，佢講左而家係邊度做、點解咁遲收工，最重要係佢話就快「回歸」，而且話阿君都會返去，嘩！兩大猛人回巢，只係唔講得笑。

期間佢問我而家做得開唔開心，我話開心。雖然做得辛苦，尤其老細無返工個陣，但總括來講，係做得開心，至少唔使日日被人監視。

Thomas火車

星期日晨咁早同屋企人去太古城同Luca飲茶，９點前已去到，我一去到就同Luca打招呼，佢竟然識得同我揮手，好開心。阿嫂話Luca呢排淨係鍾意玩Thomas & Friends的火車，佢一共有５架，我同阿爸個日都陪Luca玩火車，Luca仔開心都成日笑。

呢個星期老細回歸，減輕左我的工作量，等我都有時可以睇下奧運。老細唔係到個排，咁至少都勁少錯同無包尾，但因為時間實在太少，有D題起得麻麻地，要等到收工後先想到。

最搞笑係有個編輯竟然向我自誇自己睇過的稿，唔會有錯，校對唔會有野改，但佢偏偏出名成日錯野。好在我都有自知之明，知道自己有好多不足。

知足

同佢唔熟，但見住佢就快「死」，真係唔想。噚晚佢同我傾，很無耐地話做一個月，等如做一年，明明唔想同人爭反而飽受攻擊。佢又同我講了楊修之死，同另一個故仔。佢話有一個日本城主知道無力抵禦敵軍，於是敵人來到時大開城門，好開心地迎接佢，以避過一劫。

佢好似在食慢性毒藥，死之前還要飽受煎熬。朋友，你知道痛不欲生那種絕望、無助、精神要崩潰的感覺麻!

噚晚搭巴士返屋企時，剛巧看到《腓立比書》：「我無論在甚麼景況都可以知足，這是我已經學會了。」

這晚係巴士站同老總一齊等車。

舊公司校巴

今晚搭隧巴返屋企，係東區走廊上，一見到架旅遊車，就覺得九成九係舊公司架校巴，我落車時見佢仲係度，就幫佢影張相，行行下，到我屋企樓下，就見到兩個舊同事係度等巴士，於是傾了一陣，佢地話已經好少係呢個時間見到我，咁係因為我而家遲了好多收工，以前間中返到我屋企樓下都會見到佢地，而今晚係因為老細無返，我唔使太遲走，所以先見到，對上大家都記得係隔離間海皇粥店撞到。

呢兩日雖然老細同ta姐都無返，好彩問題少女有幫手，整體都滿意，原來今晚日本那條我起錯左題都唔知，好彩佢見到。

而家我五分鐘內要睇完一篇稿兼起／改題，好多時我都未睇完篇稿就time's up，咁趕下已經算錯得少，對上一次係中芯，個次已經１１點半左右，只畀到我１分鐘要起好條題，結果錯左。

錯野真係物都可以發生，前晚睇車頭紙，一直以為１００%唔會出事的行情表，顏色竟然出左事，四版行情表的底色一直都係綠色，結果出現有兩版係藍色，我去到production，我都未開聲，佢地已經快過我講：「我地check緊」，佢地話可能少左隻黃色，開機睇卻係無錯，真係綠色。我最後返埋位，隔左一陣佢地拿左份無錯的報紙畀我睇，我見老細無返，無人會逼我解釋發生物野事，所以我都無去追問點解，但就因為咁，搞到我要搭遲一班車。

想休息下

上星期五晚留係屋企同阿爸阿媽睇奧運開幕，我覺得有唔少環節都好好睇，尤其係李寧點聖火，好精彩，又例如由好多表演者組成的鴿仔係到飛翔、同埋煙花圍住鳥巢好似火龍般舞動、畫卷、國家隊同香港隊進場等。後來睇番報紙，本報話奧運主題歌受到批評，不過我就覺得幾好聽，而且歌詞到point已經可以，歌詞短唔短根本就唔重要。

星期六就同冬姐去半島商場買野，見到個酒店大堂好靚，有少少皇宮的宴會廳feel，好多人係到食high tea，冬姐話佢試過係文華東方食high tea啊。

跟住佢放低我係旺角，因為我約左兩個大學同學，我地去左扒王之王鋸扒。我食豬肉，佢地兩個食牛肉，好難食！差過銅鑼灣個間好多，佢地兩個先誇張，其中一個話要八成熟，點知切切下成塊碟有半碟血，嚇死我，唔好唔記得已經係八成熟！！！另一個要五成熟的，話成塊牛肉好似生的，好難切。反而蛋糕就幾好食。算啦，出來主要都係聚舊，對上一次三個人一齊出來，已經係年半前，個別咁出來就較多。

噚日我做野有火，真係太離譜，有同事話我都算忍得。不過，個晚同朋友傾完後，加上睡了一晚，第二日都無物野。而家咁忙，都無時間將怨氣留番第二日。而今晚做野都算順利。唔知幾時先可以放番幾日假休息下，我而家未放的補假已經增至十日。

一場虛驚

星期二晚收工，打三號風球，係觀塘等巴士，雖然巴士站有蓋，雨又唔算太大，但係D風勁都好厲害，將D雨撲埋我度，我個把又係縮骨傘，唔可以開，因為一定反傘，唯有將背脊去擋風擋雨，只係三分鐘時間左右，我上到巴士時，件裳同褲後面濕晒，好勁。第二日掛八號風球，好彩有同事來北角載埋我返工，真係好。

今朝仲睡緊時，聽到阿爸係出邊好激動、感覺又好似喊緊咁講電話。矇矓中我隱約聽到救護車、祖母等呢D字眼，因為阿爸一向好冷靜，搞到我好驚，我第一時間就係估唔通祖母出事，護老院要急call救護車？我即刻出房睇下阿爸物野事，原來只係救護車將祖母送去醫院覆診。跟住阿爸就極速出左門。

後來聽阿媽講番成件事，其實係阿爸自己錯左，之前阿媽已通知阿爸１１點半救護車會去到護老院接祖母，阿爸就跟車去醫院，而且須要提早半小時到，因為車唔會等人，但結果阿爸１１點幾仲係我屋企，護老院打電話來，阿爸仲同對方吵架，話護老院無通知。

阿媽話阿爸呢排脾氣轉差，睇來要去了解下。

學叻左

雖然今日遲版，老細好嬲，但我都盡晒力，接近十點我先收到第一段稿改題，唔遲都幾難。最重要係今日有一樣野我學叻左，就係有疑惑時就問左先，以保障自己，費時出現之前的問題。

首先收到華華個版，見到又係馬雲的相，我check wiser後，原來係近半個月，華華呢個版已經有六日講到馬雲，勁幫佢宣傳，於是就同老細講，後來老細都覺得有問題，於是就換左張相。

後來地產版其中一段稿，將一手周末日成交只有３宗，創出歷來新低呢個point，寫係文尾，而且只有兩行字，於是又請示老細，結果改放係第一段，而且寫長好多。

不過，我一早都預左呢個位遲早都會出事，呢幾個月其實隔一排我都同老細滲下滲下我呢個想法，等佢有D準備。……另外我而家又將同事的版樣紙，隊畀老細睇，等佢都知我的慘況，結果今日老細車我走時，真係勁係到呻。

玫瑰堂

最近看了一本書，講到尖沙咀玫瑰堂，我自己未去過，於是趁星期三去尖沙咀同朋友食飯後，順便去看看。覺得好靚，簡約、色彩簡單，入去後，好舒服，而且那日加埋我，只有3個人，可以靜心去尋找那種感覺，雖然那是天主教教堂。

跟住搭地鐵返公司，到調景嶺站落車時，先知道有兩位同事係我附近的車廂，但大家都唔知。