大挑戰

老細生日，繼續放大假。我今日兼睇埋投資版同副刊，睇了幾次投資版，以今日我改得最多，我估佢地初時都以為我淨係簽完名就算，所以次次都出左大紙先畀我睇，但我今次改到其中一版要再出過張大紙，因為我改好多，但係我唔係為改而改，因為真係錯，「雙頂量度升幅目標」應為「雙底」；「每年股價可見2.2元」實為「今年」；「寺間」應為「時間」……尤其經過今日，我估佢地應該知道我唔係畫隻龜就算。我估佢地原本以為我係外行人，點知我以前係舊公司就係要睇埋投資版的大版，仲寫過下投資版。

不過，今日其實沖版時間比較遲，因為我真係睇唔切，但聽日先係大挑戰，因為聽日正常日新聞應該開6至8版，今日得5版都搞成咁，聽日都唔知點算。老細放假的日子，我特別辛苦。

個日老細仲好意思問我：「你而家係唔係無早起身炒股」，我答：「梗係無啦，晚晚咁遲走，第二日都12點幾先起身啦!」

回報

回報唔一定係錢，辛苦左咁多日，噚日有記者同我講：「你好細心啊(睇稿)」，感覺係久旱中見到甘露。

自從要睇車頭紙之後，都未試過同舊採主一齊走，噚晚終於有機會，係公司車上好好傾，我都同佢講番呢幾日發生的事。但我睇版後，已經無同排版阿勇傾，根本無時間，沖完版後我又要睇晒咁多版，一定要抽一日傾先得。

估唔到大鄭仲係咁衰，又係到迫一位舊同事走，仲恐嚇佢，我聽左之後都好嬲。其實我之前都叫佢走，仲幫佢搵左兩份工，佢都唔走，如果經過今次件事，佢仲留低，我真係睇佢唔起。

能力有限

十萬個累。而家晚晚放工返到屋企，都散晒，好辛苦，尤其係今日。我發現就算我有幾努力，每秒鐘都唔敢停手，最後都係會有錯，點解D錯一定要等我睇到，佢地唔可以早過我睇到。我只有一對眼睛。

真係好勞氣，點解可以咁。上次老細問我，究竟問題出係邊，我直言每個階層都有問題。

來了個新採主，經常唔睇稿，一粒字都唔改、就算有好多錯都當睇唔到，將D稿直接交畀我，改死我，諷刺的係我寧願佢係咁，因為佢最叻改錯記者的稿，對的都變錯，之前的唔講，呢兩日都經典，記者寫純利係3.97億，佢改做33.97億；今日都搞笑，佢將篇稿的第一句改做「富豪產業(1881)分拆富豪產業(1881)上市，令世城系世紀系三公司……」我一邊改，一邊好激氣。佢來自東方，九成九係東方的間碟。

呢排業績期，每日都寫錯數字，我要好小心地睇，但今日開8版新聞版，其中3版係全版，其它都大版，咁多段稿真係睇死我，我隻眼係公司真係睇到好痛，睇完又輪到睇大版同改題，點解個大版會有咁多蝦碌野，佢地竟然可以睇唔到。我唔敢睇少一眼，因為我知一定會有錯。沖完版，好似只有我一個人有負任確保無錯，點解佢地唔可以睇番自己做的版一次，學壞晒。今晚沖完版後我又睇到兩個重要的錯，我最後向老細建議改其中一個，究竟我一個人的能力可以last幾耐，老細話最後會有回報，但我怕等唔到呢一日。

最近聽了一首很好聽的詩歌：歲月流轉
http://www.youtube.com/watch?v=CHKycmhDWko&feature=related

低首顧影，求神今鑑察我心境，
時間逝去，存留得失皆似影。
世事難猜算，歲月流轉，勝敗難定，
今只有上帝聽我心聲。
踏過成功失敗和對錯，但我不忘神恩，
決心跟祂腳步的帶領，
盼一生見證，求上帝察驗我心聲。
祈求神鑑察，求神引領，
現我心靈誠懇願將心思意念改正，
期望我主指引路徑，我懇請主引領。

過大海

終於睇到燈塔，好靚，仲搭了松山纜車上去。又去左金沙同威尼斯人賭場，雖然後者都幾靚，但同真正的威尼斯就差好遠好遠，最後輸了百幾蚊，但終於第一次去賭場。去左食豬扒多、大菜糕、木糠布甸。在行程中，我唔見左銀包都唔知，最後好好彩有人拾到，真係大頭蝦。又有去玫瑰堂等。

Luca識得企起身，大家都好雀躍。

主信實無變

去了一個葬禮。雖然我係最離群的一個，唔知點解好想去，可能個心係好關心大家。唔知呢，其實好多野我都搞唔清楚。

星期三主任突然叫我第二日放假，好似係主的刻意安排，因為而家係業績期，唔可以隨便放假，早一日放的那位同事就被老細鬧。雖然我無好似其他人咁經過rehersal，但都被安排坐係choir那邊，好彩兩首歌我都識唱，係《奇異恩典》同《主信實無變》。

主信實無變
http://www.youtube.com/watch?v=RamObHbnORA

慈愛主信實無變
在每天清晨 主愛已彰顯
慈愛主信實無變
沒有分陰晴 主愛勵勉
愛慕到達主跟前
愛慕救主引牽
困苦 壓迫 憂心 掛念
神愛眷必不停斷
神愛眷終不改變
慈愛主信實無變
日影西斜 主愛更溫暖
慈愛主信實無變
沒有分冬暖 主愛復眷

何牧師引述約翰福音，其中一節仲係我鍾意之一。

組員叫我多D返去，又有人以為我已轉了教會。我最後無同佢地去食野，同阿娟講時，佢話「你又靜靜雞咁走」、「你又無同佢地講先」；我話「唔該你啦」。

後來同兩位舊同事去食宵夜。

估唔到呢舖老細玩真，佢又再話要train我改稿，做採主副手，同採主分流，一齊睇記者D稿。係一個新的挑戰，始終由採訪角度去改稿同而家有D唔同，所以老細先話要再train我。

今個星期老細笑住問我：「而家都唔知你係老細，定我係老細」，好搞笑!

旅行相２

暫時post咁多先，等第二隻碟return back先再放上來！

感同身受

之前幾日我每日都要編超過半版，但又要睇版，真係超辛苦，D稿睇唔切，又睇唔切版，但又要承擔一旦有錯的所有責任，結果我自己編的版，唯有只畀自己好少時間做，要極速起題先掂。好多時陷兩難，見到自己hold住咁多稿，應該睇左其他稿畀編輯先，定係編左自己個版先。

而且晚晚要留堂。唯一好的就係老細透露曾將我、新採主同副採主，畀舊採主揀邊個做佢副手，佢竟然揀左我，舊採主話因為我可以睇到好多佢睇唔到的錯!

呢兩日又突然有變，要cut紙，結果我只需要睇版。但今日老細病左，我忙到就快死，食飯都只係搵同事幫我買落來，我幫同事畫左兩個大版，用左我唔少時間，跟住要睇成堆稿，然後就睇版改題，根本未停過手，如果有多個人睇版就好。

噚晚老細車我走時，透露佢炒左個同事後好唔安樂，佢覺得對佢的女好有歉意，因為佢個女有長期病，老細擔心會令佢個女少左醫療費而得唔到適當的治療。我感同身受……我都好唔安樂。

今晚2點走時，剛巧有位同事再講起賭神件事，我打蛇隨棍上去查問，原來被炒同事的女有學習障礙，雖然已經讀小學但思想仍然好細個，所以佢每晚同個女傾電話時講得咁特別。

旅行相

今次之行係開心、奇妙同感恩。好玩到曾經想過唔返屋企。

唔少同學與舊同事都去過意大利，估唔到最近我都有機會去。仲親歷到奇蹟。

細佬睇完都講左好多次靚，但有D我就影到好差。細佬淨係睇左一隻碟，因為另一隻係同事到。

輕鬆放假

最近晚晚好遲走，加上超多工作，結果好累，終於等到星期五、六放假啦。星期五先去左探Luca，個日佢勁開心，成日笑，跟住同阿爸阿媽食完野後，我就去買扭計骰，但而家我暫時淨係識整一面，同事亦話要買，結果係玩具反斗城買左3個。然後去左中環，跟住去灣仔買讚美之泉CD，舊年Amy送左一隻畀我，我覺得好好聽，所以去買多一隻，因為成個系列有好多隻，我就憑感覺買左紅色呢隻。之後同santa去澤記食晚飯，我實在太耐無返過去，竟然仲話係馬會落，應該話工業城先啱，結果要車到去明報先有得落。最後就同最佳損友去二記食宵夜。

第二日晨早去拜山，婆婆睡着左，但我地吵醒佢，因為有好多野食，好豐富，婆婆好鍾意高，所以佢睡的地方係高到可以睇到海景。下晝就約左個大學同學。本來呢日係約左最佳損友去澳門玩，但我甩底，唯有搵過第二日。我仲未去過東望洋燈塔，我覺得好靚，好想去。

這麼近那麼遠

噚日同新人Kozy合作編一個11條字，跟住就幫手睇版，因為老細要搞出港聞的稿。我睇版絕對唔會有人咁，只係做一個橡皮圖章，我一定要過到自己個關，上星期六我打電話畀老細，有一個版我想郁，因為實在太離譜，為左貪方便，主文的表竟然跟副稿，掉轉頭副稿的表就去跟主稿；D題唔得我會改。噚晚好趕。

同主的關係，感覺係有時近有時遠，點樣先可以觸摸到主的臉?