神奇

今日竟然係公司認番一位小學同學，仲要原來係差唔多日日都見到的財經版美術組同事，更要係工作表現麻麻的一位同事，就係綽號「翻版吳彥祖」的Tony。話說我今日見到佢個中文名「郭齊正」，突然記起好似係一個小學同學的名，同隔離的同事講，佢又幫我問佢讀邊間小學，Tony聽到我的中文名後，都記得我，仲話會帶小學時全班去旅行的相回來。

老細今日帶我去認識廣告部同事。另外在大會上，又提出可加可減機制，即有人會降職及減人工。

趕住收工，下次再寫!

把關不力

最近差唔多日日都見到蘋果見報有錯，caption寫了經金經理、680呎寫了600呎；集資44億變了集資44元、中國燃氣(384)寫了中煤(384)……其實之前都成日見到有錯，但我都費時講。以前係明報時，以為蘋果實會好少錯，校對都多好多啦，但原來都係不外如是。

抄襲Amy在佢blog的一句：「學習對所有人和事的期望減到最低，不過對自己的要求要提高」。我都好想做到，對期望減到最低，最好係無期望，應該可以令自己開心D。

最近覺得同主的距離遠了，睇少了聖經、少了祈禱、做錯多了事……

昨晚同Agnes打邊爐，好開心。

今日本來一家人去探BB，但阿哥唔畀我地去，話大嫂有親戚去佢屋企。

玩人阿姐

今次講題係關於讀神學，但我未有共鳴，加上之前那晚玩得夜，所以有些睡意，反而我趁呢段時間去睇其他的篇章。

之後就去同最佳捐友食飯，但我唔記得帶佢指定要的tempo薄荷紙巾，不能大派用場添。但有件事卻令我好驚訝，話說佢帶了我去一報紙檔，有個阿叔站著看檔，原來佢同最佳損友一樣都被人玩，檔主是一位阿姐，原來佢經常同識得的途人講要去洗手間，要途人幫手看檔，但卻一去成個多小時，而最佳損友都中過招，阿姐真係唔驚途人會等唔到而發脾氣走人?

糖水專家

我被個細路女同事在佢的blog起了個代號，叫糖水專家，我估事緣係我最近在公司食多了糖水，但唔代表我係專家。

星期三同朋友食宵夜，竟然遇到舊同事，有美術Alex、港聞hit hop妹，以及一位唔識的編輯。見到hit hop妹，第一時間梗係記起樂仔啦，因為有一些笑位。跟住就想搵樂仔食飯。

1224真係升，全靠我兩三日前拋磚引玉，因為我知道我一沽貨，股價就會升，所以我故意減持少少，賺少二千蚊，但昨日帳面反而多賺兩萬蚊，但今日將會公佈業績，應該會好差，要考驗一下莊家的力量。……其實……噚日升係因為九倉用逾74億元高價奪得一幅只有490萬呎樓面的成都地，我的愛股係成都/重慶地主，地皮升值當然會受惠啦!

麵包店

細佬剛返了大陸工作，只有我一個人住，媽咪竟然問我，使唔使上來陪我，我當然話唔使，睇來幾個月前發生的事，媽咪仍然很擔心。剛巧教會有位組員呢幾日入了精神科的醫院，又令我想起阿哥當時想轉介我睇精神科的事。我已慢慢做到盡量凡事不作勉強，心如止水，咁就無咁唔開心，連十年來的問題也想放下。

幾日前細佬講朋友開的麵包店「愛原味」分店，原來已轉蝕，初時每日生意額13000元，現在已跌到四、五千元，所以以前每月人工達三、四萬元的會計師老闆，要重出江湖，以幫補店舖支出。但細佬講那位朋友竟然計劃開分店。我現在先知點解店舖要用風閘。

怪人

星期日有位同事同我講了一單笑料。因為地產版要加大，老細於是幫地產主管落實請記者的人選，並將電話交畀地產主管，叫佢負責回覆對方。一星期後，同事問那位主管，但主管竟然未打電話畀對方，理由係「由見工到老細畀電話都隔了兩星期，人地都搵了新工啦」「而且又唔得閒打」。有無搞錯，老細叫打竟然唔做，而且而家又拖多一個星期；幾忙都好，搭廠車都可以打5分鐘電話掛。蘋果的人真係好怪，唔通連打個電話都要老細親自做?

今日老細推介隻850真係急升，以前我跟佢買輸多贏少，所以唔敢推介畀人，佢的style唔適合我，因為佢真係低買高賣，但今次我有預感會升，所以講畀其他人聽，估唔到真係升，我今日仲加碼。今日連之前老細推介的8250都急升，我終於由蝕變賺。

風雨同路

今日被老細叫了入房，因為上周五主任無返工，老細唔知有意定無意地叫我以後要跟廣告同版位，我就推塘了。在房內，老細叫我開始要學，佢話若我決定唔向採訪發展，就會安排在編輯呢條路慢慢升我上去，佢又話若立即升我，在蘋果會好易死，因為我甚麼都未識，D同事又唔會服我，一定會被人玩，老細又用佢自己被人玩的case同我講。佢又同我講留番兩位主任的目的，又講michael……

有位同事話佢之前去睇相熟醫生時，醫生係度落緊盤，電腦螢幕是大利市機，當同事聽到醫生買邊隻股票時，同事仲多口建議不如買另一隻。之後再去睇佢時，價錢收平了，好搞笑。

最佳損友送了張很有意思的書韱畀我，上面係咁寫,’good friends like you are like sunshine in life’。來了蘋果後，最好的一件事莫過於認識到呢位知己，一位可以共患難的朋友。

噚日下午與朋友去了旅行社問價錢的事，夜晚則返了晚堂，係講腓利門書(Philemon)，其中有一句係「他暫時離開你、或者是叫你永遠得著他」。另外一句有共鳴的是「他若虧負你、或欠你甚麼、都歸在我的賬上」。有很多真的要去學。

舒特拉的名單

昨晚收到在雲南做義工朋友的短訊，佢才剛剛收到我寄的生日卡，但我係7月中寄，不過後來想起我寄畀佢後，佢好像後來回來香港放暑假，所以而家先見到那張卡。

上星期有兩日假，但都沒有甚麼做過。去了探阿權一陣，5點半先去到佢間舖，權嫂同阿權細妹都係度，佢地好忙。對上一次去佢間舖，已是5月的事，上次見到權嫂更是去年12月的事。又有同最佳損友食宵夜，11點開始食，傾到3點，我5/6時間係負責聽，3點後Rocky帶了隻狗落街，3個一齊去放狗。隻狗雖然唔係我鍾意的品種，但真係好聽話，識聽人話。Rocky隱藏後叫佢名，隻狗識得憑聲音搵番主人。又有去探BB，佢越來越strong，雖然唔駛減肥，但醫生話要節食，BB個樣越來越傻。但約唔到Kelvin食宵夜，因為佢未寫完稿，要好遲走。又無去教會添。

Eva, 估唔到上次妳留言時寫得那麼長，上次我也只是一時的感慨。係啊，聽冬姐講，Bill哥哥的太太已生了BB。

今日老細講自己有張舒特拉的名單，名單上有4個人，係社長之前講過要炒。我多口問，我做第一版，實最多高層會插，咁名單上係唔係有我，但老細又話無。

afraid and trust

噚晚返到屋企，在床上看到一個散錢包，好感動。事緣上星期，我的散錢包壞了，只是同阿媽講了一次，而我後來亦從雜物中找了另外一個，但估唔到阿媽仲記得。

遇到小小阻礙，但禮物都送到權嫂到，原來《經濟》排版有大May，同細May，所以「郵差」怕送錯給人。權嫂原來真係好高級，佢係坐房。

好想無事! 「when I am afraid, I will trust in you」

主任突然話佢有車，我到係走先，下次再寫。

印度教?

前日返工時見到鄰居門前類似用油漆畫了元寶蠟燭的東西，我還以為得罪人而被人畫，今朝問阿爸，原來那戶住了印度人，不時會畫呢類圖案，阿爸話可能是信印度教那類掛。今日出門時再望，已抹走了。

噚晚坐公司車，有位姓謝的校對突然坐我隔離同我傾談，佢以為我入行不久，提醒我要注意頁碼和日期；講蘋果與同行出過的大錯；佢又話自己做了28年校對……傾到去銅鑼灣。

其中一位新同事昨日返工，做國金翻繹，做了我們的「飯友」，今日返工時同車就一齊傾，佢都聽過舊公司前編輯盧藝的名，但佢話剛入職太陽時盧藝已走了。

「千里」送禮

看了阿權的blog，突然想送生日禮物畀權嫂，於是間接地託了最佳損友的好友作郵差，如無意外應該呢一兩日收到，唔知佢鍾唔鍾意份禮物呢。呢行真係細，除了權嫂一定識，估唔到阿權都識得最佳損友。

老細又有新想頭，我與另外兩位同事將專做大市版，坐係我隔離的將會換另一位同事，與之前入房同我講的唔同。

盾牌

為了安慰朋友，估唔到最後令自己心情轉差。若那位朋友最後無事，一定要請我食飯。

昨日幫細佬買糖水時，看到班戟，好想食但最後無買，估唔到今朝一起身，爸爸就話買了班戟叫我食，真係太好啦。

聖詩同聖經裡，都成日有盾牌呢兩個字，係正面，但我反而將盾牌插在我的附近，希望主可拆走我的盾牌。

勾起回憶

昨晚與最佳損友食宵夜，食完後大家本來想去海傍傾談，但有朋友在電話間喊住幾次透露想自殺，還突然收線，我不斷打佢屋企電話同手機都唔通，令我大為緊張，於是打電話給大家的朋友幫手聯絡，幸好最後都無事。但就冷待了最佳損友，下次我地再傾過。原來有些事情經常都是一樣。

一位「飯友」前晚向老細辭了職，佢係老細的人事調動中異常重要，應該打亂了整個人事部署，本來老細話昨晚開大會，後來押後了，可能佢要重新想過。

頭先看到蔡子強寫的專欄，是講翡冷翠名勝百花聖母教堂，話要排長龍才入到去，還要行463級樓梯。之前朋友也講巴黎鐵塔搭電梯要排長龍，最後佢選擇行四百幾級樓梯上去第二層，所以所有的行程真的要預大量時間在排隊上。

常在左右

昨晚同3個朋友通電話。最佳損友打電話畀我，話老細面燶燶，問我有無中招，梗係有啦，但最激係有個地產版記者，老細話要開會，佢竟然偷走，真係博炒。跟住輪到我打畀santa；當4點、我想睡時，冬姐打電話畀我，我地傾到6點幾，中途我同佢講耶穌，咁算唔算傳緊福音，我提議去搵Bill哥哥。

剛轉組去地產版的兩位朋友今日終於在採訪時見面，佢地的英文名仲要係勁似，你地差唔多係同一時間打電話畀我。