做A1

我都有份做A1，雖然只係第二次版。

噚晚打算走時，老細走去bloomberg機，見到美股跌左500幾點，仲要係一分鐘跌300點，跟住好似食左瀉藥咁越跌越多，最多跌左700幾點，原來救市方案被眾議院投票否決，於是要改版，而我都無可能咁自私撇下老細走先掛。老細、Mol姐、我(雖然我都係出左好少力，哈哈!)，同埋國際版兩個夜更，一齊改A1同A2。連美術部港聞阿頭都要由屋企返番公司，親自改A1。

原本A1的頭條係「金融海嘯摧毀歐洲」，而家就變左「美眾議院否決救市」。最困難係出現兩個投票結果，228：205，同埋227：206，前者係第一次的投票結果，我睇有線後面應係重新投票後的結果(其他報紙話係畀議員可改變意向)，最後見外電都係用前者，於是我地就照跟，但大相就被迫用左後者的投票結果，因為只有呢張相最好。最後搞到3點45分先離開公司，不過有份參與呢次改版，都好滿足，但係最好唔好有下次啦!

見社長

星期二我返工無耐，老細突然叫我一齊入社長房，那時美術阿頭已坐係度，跟住社長不斷批評改版後的設計，最重要係社長唔係望住老細，係望住我。出左房我心想，老細有好野又唔見益我，被人鬧就搵埋我入去。到左夜晚，老細講番件事，佢原來同社長夾好計，由社長出面鬧美術阿頭的新layout唔得，搵我入去只不過想介紹我畀社長認識，佢仲專登同社長講我來自明記，因為社長對舊公司仍然有情義結。原來係咁，搞到我誤會左老細！

雖然呢排老細都有返工，但我仍然要做到死，因為經常有野出A疊，金融海嘯後，就到迷你債，然後到AIG，仲要來多過東亞擠提，老細大部份時間淨係做出面，我就要自己顧自己。本來的短週同補假，都要臨時取消，但最重要係最後搞得惦，出到紙。

唔係怕佢

近４點係北角地鐵站門口見到「鄭」係我前面，因為我好趕，如果miss左呢班地鐵，應該趕唔到４點１５分個班公司車，咁就會遲大到，所以我唯有繞路走，佢搭扶手電搭，我就行樓梯，最後總算趕得切。其實對佢都已經無野，但我怕佢捉住我傾令到我遲到，所以先出此下策。

今日開開下會，支筆無墨，我見隔離的老細又無筆，而佢好多時會拿我支筆用，加上我每次開會都好需要支筆，寫番老細想點調D版位，所以我中途同老細講左聲，就衝左出去問最佳損友借筆，如果其他同事唔知，可能又以為係上次個舖，有同事開會期間憤而離場！！！

如果唔係今次雷曼破產，真係唔知市面上咁多聲稱的所謂債券係咁高風險，美其名係迷你債券，其實係結構性衍生工具，我以前都睇過呢D廣告，我當時真係以為係債券的一種；又可以亂咁同客戶sell係同匯豐、新地等穩陣股票有關，但其實係買緊高風險的CDO同CDS。我都覺得有騙人成份。

尋覓古蹟

本來星期四、五放假，但呢排因為金融海嘯開好多版，所以都要返工，令原本計劃好星期五成個下晝去大圍、沙田周圍行，最後只去了幾處地方。

中午同朋友係大圍食完野後，由於我係網上見有介紹積存圍，跟住我地就去左。後來佢夠鐘返工走先，而我就繼續去睇吳園同曾大屋。

高樓大廈下的曾大屋

而家D樓用鐵門，佢地就用一條條橫樑。

今次之行另一目的，就係去睇下大圍的環境好唔好，原來真係幾靜，另外又正如樓盤版同事所講，大圍見到的城門河只係一條渠。

命案

前晚臨睡前，聽到出面有好微弱的痛苦聲音，望出窗外，見到有一個人在地上四腳朝天，有兩個好似係途人則企係附近，隔了一陣，警車、救護車同救火車已經趕到。

初時仲以為有人飲醉酒，因為我聽唔到撞擊的聲音，所以無想到係跳樓。但當我返工，經過屋苑大門時，見到地上有唔少祭品，已經知道不妙。後來夜晚睇車頭紙，做左內版頭，係自殺。

股市係咁跌，本來以為自己都算好彩，近幾個月都無買入股票，只係持有一些新股，點知AIG可能倒閉，自己之前就透過AIG買入基金，隨時渣都無。

四代同堂

食完飯後一家人一齊去探祖母，但Luca仔坐唔定，成間老人院被佢行晒。由於佢成日郁，所以我影的相唔靚。Luca而家要開始準備報讀幼兒班，但淨係識讀好少字，唔知面試會點呢。


兩隻狗仔企起身搵我，唔通同我好friend？其實我又係手拿住佢地最鍾意食的野！

狐假虎威

今個星期好似無物特別，可能由於老細放假，我每日的工作只有埋頭苦幹。

較為特別係呢個星期，老細愛將對我充滿火藥味，但只會顯得佢無知。個日我開完會出來，捉住我係咁鬧，根本就未查清楚成件事，明明係佢地出錯都可以咁惡，對版同一個人都可以出３張相，佢竟然覺得無問題，仲鬧我，話唔係同一張相就得，問番其他同事，反而同我想法一樣。呢個世界真係怪，聲大夾惡就可以，我無同佢鬥鬧，返埋位算數，有D野積積埋埋，就會係日後離開的理由。第二日仲神奇，佢地個組見報有一條題「歐洲加幣　長看１.3」，歐元就真，最重要係成個point，編文根本就無提過。

反而另一單就幾好，有晚收工上左公司車，跟住有個唔熟的樓盤版同事坐我隔離。傾傾下，我更係問佢沙田、大圍的樓盤資料。佢話大圍升值潛力高、但就無景睇，睇到的城門河只係一條渠；沙田中心幾好住，但點都會聽到小小車聲；而好運中心雖然係華懋樓，但同沙田中心一樣已經樓齡幾高，所以兩個盤已經無分別……

佢仲話如果日後我見到採訪單有D物野盤想睇，我可以跟埋去。

放假

今個星期將例假、短週、補假併埋一齊，結果連續放三日假。第一日就約左一個朋友去九龍城逛下，我地先去左宋王臺，跟住經過幾條隧道後，到九龍城搵野食。最後幫襯左金寶泰國食館，我就食雞絲扎肉湯河、飲珍多冰，又同佢share甜品拼盤。由於九龍城的樓都好矮，感覺好似係廣州舊區多D。

又順便睇下樓價，一百萬元樓下已經有交易，租金就大約３５００至６０００多元。不過，由於太舊，我就唔係好鍾意住係度。

又去左九龍城廣場同九龍寨城公園。覺得個公園好靚，有亭台樓閣，又夾雜住一D歷史氣息。

期間新採主突然打電話畀我，原來出左大事，理財版採主要我打電話去同佢傾。跟住我就不斷打電話斡旋，好彩事情都解決到。

夜晚有個舊同事收工後，來北角搵我食晚飯，我帶左佢去梅花村食。

第二日就去左慈雲山，搵個朋友食中午。雖然唔係假日，慈雲山中心原來都好旺，四通八達；成個商場物野舖頭都有，連郵政局、圖書館、街市都有；而且管理唔錯，咁我手上的兩手領匯股票，睇來都唔駛沽住。商場對面有間新都城髮廊，我以前住北角新都城大廈，將軍澳寶琳又有新都城，估唔到連呢度都有一間「新都城」。

夜晚就同朋友去沙田食，佢帶左我去i thai食，點左４樣野食，好豐富，最特別係條魚。跟住出左去行公園同瀝源橋，好舒服同開心。

我自己幾想住沙田，交通方便、有公園、有河景、除左商場，其他地方又唔算太多人。